ხორავას ქუჩის საქმე თავდაყირა დგება - რატომ დააკავეს მენაბდე 3 წლის შემდეგ და ვის ეკუთვნის დანა, რომლითაც დათუნა სარალიძე მოკლეს

სამართალი - 17:59, 15 Apr, 2021

3684

ხორავას ქუჩის საქმე და ჯგუფურად ჩადენილი სასტიკი მკვლელობა - პოლიციამ სამი წლის წინ ჩადენილი დანაშაულისთვის კიდევ ერთი პირი დააკავა, რომელიც დეკანოზ შიო მენაბდის შვილი გიორგი მენაბდეა.

გამოძიება მას წინასწარი შეცნობით, არასრულწლოვნის ჯგუფურად დამამძიმებელ გარემოებაში ჩადენილ განზრახ მკვლელობას ედავება.

მენაბდის დაკავებამ შესაძლოა მკვლელობის საქმე თავდაყირა დააყენოს.

დაკავებული მიხეილ კალანდიას ადვოკატი ამბობს, რომ აღნიშნული სამართლებრივი ქმედება ჯერ კიდევ 3 წლის წინ უნდა განხორციელებულიყო, რადგან ბრალდების მხარემ დღეს გაიზიარა მოსაზრება, რომ დანის პატრონი სწორედ გიორგი მენაბდე უნდა ყოფილიყო. მაშინ ითქვა, რომ სასულიერო პირის შვილი გარჩევის დროს ზურგის არეში დაიჭრა, თუმცა, მაშინ სამართალდამცავი უწყებები ამ ფაქტს არ ადასტურებდნენ.

"შინაგან საქმეთა სამინისტროს განცხადება, თავდაყირა აყენებს ხორავას ქუჩის საქმეში მიხეილ კალანდიას წინააღმდეგ გამოტანილ უკანო განაჩენს, რადგან მოსაზრება, რომ გიორგი მენაბდე უნდა ყოფილიყო იმ დანის პატრონი, რომელიც ინკოგნიტოდ არის საქმეში, სავარაუდოდ, ბრალდების მხარემ უკვე გაიზიარა" - აცხადებს კალანდიას უფლებადამცველი ზურაბ თოდუა ტვ პირველთან.

ხორავას ქუჩაზე სასტიკი მკვლელობა 2017 წლის დეკემბერში მოხდა - ჯგუფურად ჩადენილი დანაშაულის დროს ორი არასრულწლოვანი დათუნა სარალიძე და ლევან დადუნაშვილი ცივი იარაღით მიყენებული მრავლობითი ჭრილობების შედეგად გარდაიცვალნენ.

დეკანოზ შიო მენაბდის შვილს გამოძიება დამნაშავისათვის წინასწარი შეცნობით არასრულწლოვნის ჯგუფურად დამამძიმებელ გარემოებაში ჩადენილ განზრახ მკვლელობას ედავება, რაც სისხლის სამართლის კოდექსის 109-ე მუხლის მე-2 ნაწილის „ბ“ და „ე“ ქვეპუნქტებით თავისუფლების აღკვეთას 13-დან 17 წლამდე ითვალისწინებს.