,,გულუბრყვილობაა საუბარი იმაზე, რომ უკრაინის თემა არანაირად არაა მიბმული საქართველოზე

აღმოსავლეთ პარტნიორობის ფარგლებში სამი ქვეყანა მიდიოდა ევროკავშირისკენ: საქართველო, უკრაინა და მოლდოვა.

უკრაინას ლობირებდა გერმანია, მოლდოვას – რუმინეთი, ჩვენ ამ სამეულში მოვხვდით მხოლოდ იმიტომ რომ ვატარებდით რეფორმებს, როგორც ასეთი, ძლიერი ლობისტი საქართველოს არ ჰყოლია.

უკრაინის მოსახლეობა არის დაახლოებით 50 მილიონი, ასეთი დიდი ბაზარი ეკონომიკური თვალსაზრისით არ არსებობს, სწორედ ამიტომ ლობირებდა გერმანია, რომლის ეკონომიკა ყველაზე დიდ ზრდას განიცდის ევროპაში. გერმანია დღეს ავიდა თავისი ეკონომიკის პიკზე, იმისთვის რომ ეს ზრდა გაგრძელდეს, მას წყალივით სჭირდება ახალი ბაზარი. უკრაინა კი ამისთვის საუკეთესო საშუალება იყო. ამიტომაც ჰქონდა ანგელა მერკელს უპრეცედენტო რეაქცია იანუკოვიჩის გადაწყვეტილებაზე.

მე ასეთი აღშფოთებული მერკელი არ მახსოვს არც მაშინ, როდესაც რუსები ჩეჩნებს ხოცავდნენ და არც მაშინ, როდესაც საქართველოზე სამხედრო აგრესია განახორციელა. ამ შემთხვევაში მას ჰქონდა გამწარებული ადამიანის რეაქცია, რადგან საქმე ეხებოდა უშუალოდ მისი ქვეყნის ინტერესებს.

გასაგებია მოლდოვას შემთხვევაც, რუმინეთი ლობირებდა მას, რადგან ის პრაქტიკულად საკუთარ ნაწილად განიხილავს ამ ქვეყანას, მოსახლეობის დიდი ნაწილი ორმაგი მოქალაქეა.

ჩვენი ლობისტი კი იყო ის რეფორმები, რომელსაც ვახორციელებდით, ამიტომ ამ პროცესში, უკრაინასთან ერთად, წყვილში გასვლა ხელს გვაძლევდა, რადგან უკრაინას ჰყავდა ძლიერი ლობი, გერმანიის სახით. როდესაც კიევი ამ პროცესს გამოეთიშა, ცხადია, ეს ჩვენზეც იქონიებს გავლენას.

უკრაინაზე დიდი არის რუსეთის წნეხი, მაგრამ არანაკლებ მნიშვნელოვანია ერთი ასპექტიც, რომელზეც, სამწუხაროდ, ბევრი არ საუბრობს. იანუკოვიჩზე ძალიან დიდი ზეწოლა მოხდა უკრაინელი ოლიგარქების მიერ, რადგან ამათი ბიზნესები რუსეთზეა ორიენტირებული“, - წერს დიმიტრი შაშკინი.