როგორც ჭკადუა "საქართველო და მსოფლიოსთან" ინტერვიუში აღნიშნავს, მას იმედი აქვს, რომ ამ საქმის გამოძიება დასრულდება და დაისჯებიან დამნაშავეები, მისი თქმით, წინააღმდეგ შემთხვევაში "ვენდეტა" დაიწყება.

"სწორედ მან დაწვა დაჭრილი და დატყვევებული ევგენი აფრასიძე, ბარამიძემ მოსახლებას არ მისცა საშუალება, გვამი გამოეტანათ ცეცხლწაკიდებული სახლიდან. იგი ხელებს ითბობდა ცეცხლზე, რომელიც სახლს ეკიდა და რომელშიც ადამიანი იწვოდა.

მართალია ისიც, რომ იგი მიმართავდა მეზობლად მცხოვრებ ქალბატონებს, რომ მისთვის კუბდარი გამოეცხოთ, რაზეც უარი მიიღო, შემდეგ კი თავისი თანამებრძოლები გააგზავნა, საჭმელი მოატანინა და ჭამაც იქვე დაიწყო. ცარიელი კონსერვის ქილები იქვე დატოვეს. ამ ფაქტის მოწმე მოსახლეობაა.

ბარამიძის ბრძანებით იბომბებოდა ის სახლი, რომელშიც ოთხ მცირეწლოვან ბავშვს და ორ ქალს ეძინათ, მათ შორის ერთი ღრმად მოხუცებული იყო, ხოლო მეორე, შმაგი აფრასიძის მეუღლე,ფსიქიურად დაავადდა და დღემდე ფსიქიატრიულში მკურნალობს.

აღნიშნული სპეცოპერაცია სააკაშვილის, ადეიშვილის, მერაბიშვილის დიდი დამსახურებაა, რაც სააკაშვილმა აღიარა კიდეც. ოჯახს მთლიანად გაუნადგურეს კერძო საკუთრება, ორი ადამიანი მოკლეს და ორი _ ციხეში საშინელ პირობებში გაუშვეს. ოთხი მცირეწლოვანი ბავშვი მოხუცთან ერთად ქუჩაში დატოვეს ,“- აცხადებს ჭკადუა.

მისი თქმით, აღნიშნული საქმე სტრასბურგშია გაგზავნილი და მას შემდეგ, რაც ხელახლა დაიწყო ძიება, ევროსასამართლომ შესთავაზა მორიგება და კომპენსაციის სახით ზარალის ანაზღაურება.

"ევროსასამართლომ შემოგვთავაზა მორიგება და კომპენსაციის სახით ზარალის ანაზღაურება. რადგან მკვდრებს ვერ გააცოცხლებენ, ცოცხლებს კი შველა სჭირდებათ. თანაც ამნისტიის შემდეგ აფრასიძეებმა საპყრობილე დატოვეს. აფრასიძეებს იარაღი რომც ჰქონოდათ, არავითარ შემთხვევაში არ გამოიყენებდნენ, რადგან სახლში მცირეწლოვანი ბავშვები ჰყავდათ და თან ხედავდნენ, რომ აურაცხელი სპეცრაზმელის გარემოცვაში იყვნენ.

ევგენი აფრასიძე სახლიდან ხელებაწეული გამოვიდა, თავდამსხმელებს მიმართა, რომ აქ ვართ და გნებდებითო. ევგენი აფრასიძეს ტყვია იღლიაში აქვს მოხვედრილი, მერე დაჭრილი შეიყვანეს საკუთარ სახლში და ცოცხლად დაწვეს. თუ ბარამიძეს ჰგონია, რომ ეს შერჩა და დიდი ალბათობაა ამისა, მე ვიტყვი, რომ უფალი სამართლიანია, მას უფლის რისხვა აუცილებლად დაატყდება თავს. ხოლო სამართლებრივ საკითხს რაც შეეხება, გამოძიება მიმდინარეობს და იმედს ვიტოვებ, კოჰაბიტაციის რეჟიმში ყოფნის შედეგი იყო ის, რომ დღემდე ბარამიძე დაკითხულიც კი არ არის ამ საქმეზე და არ აქვს ბრალი წაყენებული", - აცხადებს ჭკადუა.

მისივე თქმით, ის დარწმუნებულია, რომ ამ საქმეზე არავის დაიჭერენ, ამის გაკეთება რომ სდომებოდა ახალ ხელისუფლებას ჭკადუას განცხადებით, ყველა მტკიცებულება ჰქონდათ. ,,ჩვენ ცოტა ხანს დაველოდებით და შემდეგ განცხადებებს გავაკეთებთ. დიდი იმედი მაქვს,რომ ვენდეტაზე არ გადავალთ, რაც, ალბათ, ყველაზე სამწუხარო და შემაშფოთებელი იქნება, თუმცა უკვე ჩანს, რომ სამართლიანობის აღდგენის დაპირებით მოსული ხელისუფლება არ აპირებს პირობის შესრულებას. შეურაცხყოფილი, გაუპატიურებული, განადგურებული, ქონებაჩამორთმეული ადამიანები, როდესაც საბოლოოდ დარწმუნდებიან, რომ არავინ მათ დაცვას არ აპირებს, თავად დაიწყებენ შურისძიებას. ამის რამდენიმე "მსუბუქი" მაგალითი უკვე გვაქვს. ხელისუფლება ვალდებულია, დაიცვას თავისი მოქალაქეები არამარტო ნამდვილი კრიმინალებისგან, არამედ იმ დამნაშავეებისგანაც, რომლებიც ხელისუფლებაში სხედან.... ღმერთმა ნუ ქნას, აფრასიძეებმა ეს გადაწყვეტილება მიიღონ...“- აცხადებს ჭკადუა "საქართველო და მსოფლიოსთან" ინტერვიუში.