აფხაზეთის მთავრობის სახლთან დაპირისპირების დროს პოლიციელის მხრიდან უფლებამოსილების გადამეტების ფაქტზე სახელმწიფო ინსპექტორის სამსახურმა გამოძიება დაიწყო - ამის შესახებ განცხადებას თავად უწყება ავრცელებს:

"2021 წლის 12 აპრილს, სახელმწიფო ინსპექტორის სამსახურში შემოსული განცხადების საფუძველზე, სახელმწიფო ინსპექტორის სამსახურის საგამოძიებო დეპარტამენტში დაუყოვნებლივ დაიწყო გამოძიება აფხაზეთის ავტონომიური რესპუბლიკის მთავრობის ადმინისტრაციულ შენობასთან, შინაგან საქმეთა სამინისტროს ცალკეულ თანამშრომელთა მხრიდან შეკრების მონაწილეების მიმართ განხორციელებული სავარაუდო სამსახურებრივი უფლებამოსილების ძალადობით გადამეტების ფაქტზე, საქართველოს სისხლის სამართლის კოდექსის 333-ე მუხლის ,,ბ'' ქვეპუნქტით გათვალისწინებული დანაშაულის ნიშნებით.

განცხადების მიღების შემდგომ, დაუყოვნებლივ განხორციელდა განმცხადებელთან კომუნიკაცია გამოკითხვის მიზნით, თუმცა მისი სურვილით საგამოძიებო მოქმედება გადაიდო შემდეგი დღისთვის.

სახელმწიფო ინსპექტორის სამსახური ეფექტიანი გამოძიების უზრუნველყოფის მიზნით, აღნიშნულ საქმეზე ჩაატარებს ყველა საჭირო საგამოძიებო და საპროცესო მოქმედებას" - ნათქვამია განცხადებაში.

ინციდენტის დროს პოლიციამ 6 აქტივისტი დააკავა. ერთ-ერთმა სამართალდამცველმა აქტივისტებს ხელი დაარტყა. დაპირისპირება მას შემდეგ მოხდა, რაც აქციის მონაწილეებმა აფხაზეთის ავტონომიური რესპუბლიკის მთავრობის წევრებთან შეხვედრა მოითხოვეს.

აქტივისტები ოკუპირებული აფხაზეთიდან საქართველოს კონტროლირებად ტერიტორიაზე გადმოსვლისას ხუთდღიანი კარანტინის გაუქმებას მოითხოვდნენ.