"სტრატეგია აღმაშენებლის" ლიდერის გიორგი ვაშაძის განცხადებით, სადაც ობიექტურბა იქნება, მიიღებს შესაბამის გადაწყვეტილებას და შეეცდება ოპოზიციური პარტიებიც დაითანხმოს. მისივე თქმით, მოლაპარაკებების პროცესი უსასრულოდ ვერ გაგძელდება და შეთანხმების წერტილამდე მისვლა აუცილებელია:

„ნამდვილად შეთანხმებისკენ სვლა, ჩემი აზრით, უნდა გვინდოდეს ყველას და ეს უნდა ქართულ საზოგადოებას. მეორე, მათ მოვუწოდებ, იყვნენ უფრო კომპრომისულები და რეალურად აღიქვან სიტუაცია. მესამე, იქ, სადაც ობიექტურობა იქნება, მე ყოველთვის მივიღებ შესაბამის გადაწყვეტილებას, მაგრამ შევეცდები, ყველა ოპოზიციური პარტია დავითანხმო, ჩემი პარტნიორები ამ გადაწყვეტილებაზე. არ ვიცი, რას საუბრობს ეს ადამიანი, მაგრამ სჯობს, ზედმეტ ლაპარაკს, დავსხდეთ და რეალურად შევთანხმდეთ. ამ დოკუმენტში უნდა იყოს ხუთივე საკითხი, მათ უნდათ, რომ ამოაგდონ ამ დოკუმენტიდან საკითხების ნაწილი. ხუთივე საკითხი უნდა იყოს და ხუთივე საკითხთან დაკავშირებით უნდა შევთანხმდეთ. გუშინდელი განცხადება გავაკეთე არა მარტო ქვეყნის შიგნით აუდიტორიისთვის, არამედ ჩვენი საერთაშორისო პარტნიორებისთვის და მეგობრებისთვის. ერთი, რომ ვაჩვენეთ ჩვენი მზაობა მოლაპარაკებისთვის და მეორე, ვთქვი, რომ უსასრულოდ ეს პროცესი ვერ გაიწელება და დროულად სჭირდება გადაწყვეტა ამ სიტუაციას. იმედი მაქვს, ეს იქნება მომავალ კვირაში, მაქსიმუმ იმის იქით კვირაში, მეტი უსასრულოდ ხომ ვერ გრძელდება ეს პროცესი, ამიტომ დროულად უნდა მივიდეთ შეთანხმების წერტილამდე“,-განაცხადა გიორგი ვაშაძემ.

შეგახსენებთ, საქართველოს პარლამენტის თავმჯდომარემ, არჩილ თალაკვაძემ განაცხადა, რომ გიორგი ვაშაძე ნამდვილად იყო ერთ-ერთი პოლიტიკოსი ოპოზიციიდან, რომელსაც სურს ეს შეთანხმება შედგეს. მისი თქმით, მან უფრო გაბედული ნაბიჯები უნდა გადადგას იმ კოლეგებთან ერთად, ვისაც აქვს ჯანსაღი დამოკიდებულება ამ დიალოგის ფარგლებში და ვინც ნამდვილად თვლის, რომ დემოკრატიისთვის სახელმწიფო ინსტიტუტებისთვის ძირის გამოთხრა ეს არ არის გამარჯვება ოპოზიციისთვის.