საქართველოს გენერალურ პროკუატურაში აზერბაიჯანელი ჟურნალისტი აფგან მუხთარლი ვერ დაკითხეს - მიზეზი თარჯიმნის უზრუნველყოფა გახდა. საგამოძიებო უწყებამ აზერბაიჯანული ენიხ მცოდნე თარჯიმანი ვერ იპოვნა.

ადვოკატის განცხადებით, აფგან მუხთარლი მზად არის, თარჯიმნის უზრუნველყოფის შემთხვევაში, გამოძიებასთან ნებისმიერ დროს ითანამშრომლოს.

„დღეს გამოკითხვა ვერ შედგა, ვინაიდან, როდესაც პროკურატურის ოფისში გამომძიებელთან ავედით, თურქულენოვანი თარჯიმანი დაგვხვდა. დაახლოებით 1.5 საათი დასჭირდათ დრო იმისთვის, რომ აზერბაიჯანულენოვანი თარჯიმანი მოეწვიათ, როგორც გვითხრეს, მაგრამ გამოკითხვის დაწყებიდან, დაახლოებით 2 საათის შემდეგ, გაირკვა, რომ თარგმანის დროს გარკვეული ხარვეზები იყო და ამის გამო გამოკითხვა ვეღარ დასრულდა.

დღეს ჩვენთვის ცნობილი გახდა ის, რომ გამოძიება აპირებს, საგამოძიებო ექსპერიმენტი ჩაატაროს. ყველა იმ წინადადებაზე განვაცხადეთ თანხმობა, რაც გამოძიებას ჰქონდა. მზად ვართ გამოძიებასთან ვითანამშრომლოთ. ჩვენ დავაფიქსირეთ პოზიცია, რომ მაგალითად, ხვალ თუ იქნება უზრუნველყოფილი აზერბაიჯანული ენის თარჯიმანი, მზად ვართ, დილიდანვე გამოვცხადდეთ და მონაწილეობა მივიღოთ პროცესში, ასევე ყველა იმ საგამოძიებო მოქმედებაში ჩავერთოთ, რომელსაც გამოძიება აპირებს.

საგამოძიებო ექსპერიმენტი ან თუ რაიმე ნიმუშის აღება უნდათ, მაგალითად, დნმ-ის, აფგანი მზად არის მონაწილეობა მიიღოს. აფგანი მზად არის ყველანაირად ითანამშრომლოს გამოძიებასთან, ოღონდ იმ პირობებში, თუ თარჯიმანი უზრუნველყოფილი იქნება ,- განაცხადა მუხთარლის ადვოკატმა არჩილ ჩოფიკაშვილმა.