გაზრდილია დაუსაბუთებელი პატიმრობის შემთხვევები

გაზრდილია დაუსაბუთებელი პატიმრობის შემთხვევები - "საიას" ბოლო ოთხი წლის ანგარიში

სამართალი - 14:21, 06 Apr, 2021

1245

"საქართველოს ახალგაზრდა იურისტთა ასოციაციამ" ბოლო 4 წლის ანგარიში გამოაქვეყნა, რომელშიც აქცენტი პროკურატურის მხრიდან აღკვეთის ღონისძიების სახით პატიმრობის შეფარდების მოთხოვნის ზრდაზე კეთდება. როგორც ანგარიშშია ნათქვამი, ხშირ შემთხვევაში პატიმრობა დაუსაბუთებელია და არ არის გამყარებული თანაზომიერი არგუმენტაციით:
"საიას მონიტორინგის შედეგად გამოიკვეთა, რომ ყოველწლიურად იზრდება პროკურატურის მიერ მოთხოვნილი პატიმრობის მაჩვენებელი. ამ მხრივ ყველაზე საგანგაშო აღმოჩნდა 2019-2020 წლის საანგარიშო პერიოდში დაფიქსირებული მონაცემი, რომელიც, წინა საანგარიშო პერიოდთან შედარებით, 6 პროცენტული ერთეულით არის გაზრდილი. პროკურატურა 686 ბრალდებულიდან 454-ის (66%) მიმართ ითხოვდა პატიმრობას. აქედან სასამართლომ 116 (26%) შუამდგომლობა არ დააკმაყოფილა.
დადებითად უნდა შეფასდეს, რომ 2018 წლის მარტიდან 2019 წლის თებერვლის ჩათვლით პერიოდთან შედარებით, 8 პროცენტული ერთეულით შემცირდა სასამართლოს მხრიდან პროკურატურის მიერ მოთხოვნილი პატიმრობის დაკმაყოფილების მაჩვენებელი. თუმცა, აღსანიშნავია, რომ 2019-2020 წლების საანგარიშო პერიოდში დაუსაბუთებელი პატიმრობის შემთხვევები 6 პროცენტული ერთეულით გაიზარდა.
დაუსაბუთებელი პატიმრობის შემთხვევების მატება ადასტურებს, რომ სასამართლო აღკვეთის ღონისძიების ამ სახეს კვლავ არ განიხილავს, როგორც ყველაზე მკაცრ ზომას, რომელიც მხოლოდ უკიდურეს შემთხვევაში უნდა იყოს გამოყენებული", - წერია ანგარიშში.