ნიკა მელიას ადვოკატის გიორგი კონდახაშვილის განცხადებით, სასამართლოს 1% -იანი მიზეზიც არ აქვს, რომ ენმ-ს თავმჯდომარე პატიმრობაში დატოვოს. მისი განმარტებით, დაცვის მხარე პროცესზე მნიშვნელოვან მტკიცებულებებს წარმოადგენს, რომელიც კიდევ ერთხელ გაუსვამს ხაზს მელიას პოლიტიკური ნიშნით პატიმრობის თაობაზე:

"ჩვენ, რა თქმა უნდა, ილუზია არავის გვაქვს, რომ სასამართლოში მიიღება გადაწყვეტილება. ჩვენ, დიდი ალბათობით, 8 აპრილს მოვისმენთ პოლიტიკურ გადაწყვეტილებას, რომელსაც გაახმოვანებს სასამართლო, ნიკა მელიას გაათავისუფლებს უკანონო პატიმრობიდან, თუ იგი დარჩება პოლიტიკური პატიმრობის ქვეშ.

თუკი ამას კანონის თვალათახედვით შევხედავთ, არ არსებობს 1% იმისა, რომ მოსამართლემ მიიღოს გადაწყვეტილება, ნიკა მელია დატოვოს პატიმრობაში.

ჩვენ წარვდგებით შუამდგომლობებით, ახალ ძალიან მნიშვნელოვან მტკიცებულებებს წარვადგენთ საქმეზე. ეს არის ძალიან მნიშვნელოვანი მტკიცებულებები, რომლებიც გამოვლინდა სასამართლო პროცესის შემდგომ, რაც კიდევ ერთხელ ხაზს გაუსვამს და ერთმნიშვნელოვანს გახდის ნიკა მელიას საქმის პოლიტიკურ მოტივაციას და პოლიტიკური დევნის ფაქტებს დაადასტურებს. რა კონკრეტულ მტკიცებულებებზეა საუბარი, ეს დაცვის პოზიციისგან გამომდინარე, უშუალოდ სასამართლო პროცესზე გაჟღერდება", - განაცხადა კონდახაშვილმა.

შეგახსენებთ, რომ ნიკა მელიას სასამართლო პროცესი 8 აპრილს, 11:00 საათზე ჩაინიშნა.