თბილისის საქალაქო სასამართლოში 26 მაისის საქმეზე გამართულ შინაგან საქმეთა ყოფილი მინისტრის ვანო მერაბიშვილის სასამართლო პროცესზე დაცვის მხარემ სამი შუამდგომლობა დააყენა, თუმცა მოსამართლემ არც ერთი არ დააკმაყოფილა.

ადვოკატები მერაბიშვილისთვის წინასწარი პატიმრობის გაუქმებას ან მისი გირაოთი შეცვლას მოითხოვდნენ. გარდა ამისა, დაცვის მხარე პროკურორების თავიდან აცილებასაც ითხოვდა, რაც მოსამართლემ 15 წუთიანი თათბირის შემდეგ არ დააკმაყოფილა.
ადვოკატები მიიჩნევენ, რომ ვანო მერაბიშვილი შესაძლო დანაშაულის ჩადენის პერიოდში მთავრობის წევრი იყო და მის მიმართ სისხლის სამართლებრივ დევნას მთავარი პროკურორი უნდა ახორციელებდეს.
დაცვის მხარეს პროკურორი ნათია მეზვრიშვილი პროცესზე გამოეხმაურა.

“ჩვენ რომ კანონის დარღვევით ვართ თანამდებობაზე დანიშნული, აღნიშნულის დამადასტურებელი მოწმე დაცვის მხარეს დღევანდელ სასამრთლო პროცესზე არ მოუყვანია.ნათია მეზვრიშვილი, ჯარჯი წიკლაური, არჩილ ტყეშელაშვილი მთავარი პროკურორის მიერ არიან დანიშნულები დაკავებულ თანამდებობაზე, შესაბამისად კანონის დარღვევას ჩვენი დანიშვნის დროს ადგილი არ ჰქონია”,–განაცხადა ნათია მეზვრიშვილმა.
ამასთან, ადვოკატებმა თავად მოსამართლის აცილების შუამდგომლობაც დააყენეს, თუმცა არც ეს შუამდგომლობა არ დაკმაყოფილდა.

შეგახსენებთ, ყოფილი შს მინისტრი პროკურატურამ ბრალდებულად 2011 წლის 26 მაისს, სამსახურებრივი უფლებამოსილების გადამეტებისთვის ცნო. “ნაციონალური მოძრაობის” გენერალურ მდივანს, ვანო მერაბიშვილს 26 მაისის საქმეზე წინასწარი პატიმრობა სასამართლომ 30 მაისს შეუფარდა.