ისინი ქვეყანაში შემოვიდნენ კანონთან სრულ შესაბამისობაში, დესტრუქციულმა ნაციონალურმა მოძრაობამ მოვლენები თავისი დღის წესრიგის ფარგლებში მოაქცია

ისინი ქვეყანაში შემოვიდნენ კანონთან სრულ შესაბამისობაში, დესტრუქციულმა ნაციონალურმა მოძრაობამ მოვლენები თავისი დღის წესრიგის ფარგლებში მოაქცია - ღარიბაშვილი პოზნერის ვიზიტზე

პოლიტიკა - 11:09, 01 Apr, 2021

1834

პრემიერი-მინისტრმა ირაკლი ღარიბაშვილმა მთავრობის ბრიფინგზე საქართველოში პოზნერის ვიზიტსა და მოქალაქეების პროტესტთან დაკავშირებით გააკეთა განცხადება და აღნიშნა, რომ რუსი პროპაგანდისტი ჟურნალიტი დელეგაციასთან ერთად კანონთან შესაბამისობაში ეწვია საქართველოს. სტუმრებს გაკეთებული ჰქონდათ კორონავირუსის ტესტი. რაც შეეხება წუხანდელ პროტესტს, ღარიბაშვილის თქმით, მოქალაქეების მწვავე რეაქციით ნაციონალურმა მოძრაობამ ისარგებლა და სათავისოდ შემოატრიალა მოვლენები:

"ვლადიმერ პოზნერი არის აშშ-ის მოქალაქე, მას არ დაურღვევია კანონი ოკუპაციის შესახებ. ის ხშირად სტუმრობს საქართველოს, აშშ-ის პასპორტით, ეს იყო მისი მორიგი კერძო ხასიათის ვიზიტი, ამასთან, მთავრობის დადგენილების ფარგლებში ისინი ქვეყანაში შემოვიდნენ კანონთან სრულ შესაბამისობაში, ჰქონდათ კორონავირუსის უარყოფითი ტესტის პასუხი.

რაც შეეხება სტუმრების შეკრებას თბილისის ერთ-ერთ დაწესებულებაში რეგულაციების გაუთვალისწინებლად - ეს, რა თქმა უნდა, მიუღებელია. შესაბამის უწყებებს ჰქონდათ მყისიერი რეაგირება. დაჯარიმდა როგორც დაწესებულება, ასევე ყოველი ინდივიდი. მოქალაქეებმა პროტესტის გამოხატვა გადაწყვიტეს, რითაც ისარგებლა ყველაზე დესტრუქციულმა ძალამ ნაციონალურმა მოძრაობამ და გროგორც ჩვევიათ, მოვლენები თავიანთი დღის წესრიგის ფარგლებში მოაქციეს. ამჯერადაც, ნაციონალური მოძრაობის და კერძოდ სააკაშვილის მიზანია დესტრუქცია, საბოტაჟი და ჩვენი ქვეყნისთვის მაქსიმალური ზიანის მიყენება, ჩვენი ქვეყნის საერთაშორისო იმიჯის შელახვა. ამჯერადაც ეს გააკეთეს იმ ფონზე, როცა ნაწილობრივ იხსნება ტურისტებისთვის. მოგეხსენებათ. ამ ვითარებაში რაოდენ მნიშვნელოვანია ტურისტების შემოსვლა. ყოვლად დაუშვებელი იყო ნაციონალური მოძრაობისა და მათი ლიდერების პროტესტის ეს ფორმა, რაც აშკარად ცდება ცივილიზებულ ნორმებს. ჩვენ კიდევ ერთხელ დავრწმუნდით, რომ ნაციონალური მოძრაობა ჩამოყალიბდა აბსოლუტურად დეგრადირებულ და რადიკალურ ჯგუფად, რომელთანაც ცივილიზებული დიალოგი შეუძლებელია" - განაცხადა ღარიბაშვილმა მთავრობის ბრიფინგზე.