გურჯაანში, სოფელ ჩუმლაყში ერთი ადამიანის მკვლელობისა და სამი ადამიანის დაჭრის საქმეზე დაკავებულებს ბრალი ოფიციალურად წარუდგინეს - ორივე ბრალდებული კახეთის პოლიციის დეპარტამენტის დროებითი მოთავსების იზოლატორში იმყოფება.

დაკავებულების უფლებადამცველის თქმით, ჩადენილ დანაშაულში ორივე ბრალდებული თავს ნაწილობრივ დამნაშავედ სცნობს.

აღკვეთის ღონისძიების საკითხზე თელავის რაიონული სასამართლო ხვალ იმსჯელებს.

განზრახ მკვლელობის და სამი პირის მიმართ დამამძიმებელ გარემოებაში ჩადენილ განზრახ მკვლელობის მცდელობის, ასევე, ცეცხლსასროლი იარაღის მართლსაწინააღმდეგო შეძენა-შენახვა-ტარების ფაქტებზე გამოძიება საქართველოს სისხლის სამართლის კოდექსის 108-ე, 19-109-ე და 236-ე მუხლებით მიმდინარეობს.

დანაშაული 16-დან 20 წლამდე ვადით ან უვადო თავისუფლების აღკვეთას ითვალისწინებს.

ცნობისთვის, 25 მარტს სოფელ ჩუმლაყში ერთი ადამიანი მოკლეს და სამი დაჭრეს.