მმართველი პარტიის მიერ დარეგისტრირებული ცვლილებების შედეგად, რომელიც საერთო სასამართლოების შესახებ ორგანულ კანონში უნდა შევიდეს, იუსტიციის უმაღლესი საბჭოს მიერ უზენაესი სასამართლოს მოსამართლეობის კანდიდატების შერჩევის წესი ნაწილობრივ იცვლება.

ასევე, გაუქმდება იუსტიციის უმაღლეს საბჭოში არსებული ნახევრად ღია კენჭისყრის წესი და ეს პროცედურა ღია იქნება; პარლამენტს ასარჩევად მხოლოდ საუკეთესო შეფასების მქონე მოსამართლეობის კანდიდატებს წარუდგენენ; იუსტიციის საბჭოს წევრს კი კენჭისყრის დროს მისი პოზიციის დასაბუთების ვალდებულება ექნება.

ცვლილებებს საბჭოს არამოსამართლე წევრი, ნაზი ჯანეზაშვილი აფასებს და ამბობს, რომ ეს საერთაშორისო საზოგადოების მოსაჩვენებლად ხდება.

"ჩვენ გვჭირდება საკანონმდებლო ცვლილებები და ნებისმიერი სიახლეები მხოლოდ იმისთვის, რომ მივიღოთ კარგი სასამართლო და ჩვენმა ქვეყანამ მიიღოს დამოუკიდებელი მართლმსაჯულების სისტემა. ეს წარმოდგენილი ცვლილებები ამას ვერ უზრუნველყოფს.

ცვლილებები კოსმეტიკური დანიშნულებისაა" - აღნიშნავს ჯანეზაშვილი.