სააპელაციო სასამართლოს გადაწყვეტილება ცნობილია - 14 წლის გოგონას გაუპატიურებისთვის ბრალდებული ისევ ციხეში შეაბრუნეს

სამართალი - 14:54, 19 Mar, 2021

1691

14 წლის გოგონას გაუპატიურებისთვის ბრალდებული ისევ ციხეშია - გადაწყვეტილება სააპელაციო სასამართლომ მიიღო, მანამდე კი თელავის საქალაქო სასამართლომ ბრალდებული გირაოს სანაცვლოდ გაათავისუფლა. პროკურატურამ თელავის საქალაქო სასამართლოს გადაწყვეტილება სააპელაციოში 17 მარტს გაასაჩივრა.
საქმე ეხება თელავში მომხდარ გაუპატიურებას - 14 წლის გოგონაზე სექსუალური ძალადობის შემდეგ დაზარალებული საკუთარმა ძმამ რამდენჯერმე სცემა.
გაუპატიურებაში ბრალდებულის გარდა, დაკავებულია გოგონას ძმაც, რომელსაც განხორციელებული ძალადობისთვის 3 წლამდე პატიმრობა ემუქრება. რაც შეეხება სექსუალურად მოძალადეს, მისი სასჯელი 7-დან 9 წლამდე განისაზღვრება:
"შინაგან საქმეთა სამინისტროს მიერ ჩატარებული გამოძიებით დადგინდა, რომ 2020 წლის ოქტომბერში ა.ნ.-მ წინასწარი შეცნობით 14 წლის არასრულწლოვან გოგონასთან სექსუალური კავშირი რამდენჯერმე დაამყარა. აღსანიშნავია, რომ ამავე საქმეზე ოჯახის წევრის მიმართ განხორციელებული ძალადობის ფაქტზე ასევე 12 მარტს ი.უ. დააკავეს. გამოძიებით დადგინდა, რომ ი.უ. არასრულწლოვან დას სისტემატიურად აყენებდა ფიზიკურ და სიტყვიერ შეურაცხყოფას, რადგან დაზარალებული ხვდებოდა მასზე ბევრად უფროს და დაოჯახებულ მამაკაცს.ა.ნ.-ს ბრალდება საქართველოს სისხლის სამართლის კოდექსის 140-ე მუხლის პირველი ნაწილით, ხოლო ი.უ.-ს 11 პრიმა 126 მუხლის მეორე ნაწილის „დ“ ქვეპუნქტით და 126 პრიმა მუხლის მეორე ნაწილის „ა“ ქვეპუნქტით წარედგინათ.პროკურატურამ ორივე ბრალდებულისთვის აღკვეთის ღონისძიების სახით პატიმრობა მოითხოვა, მოსამართლემ ი.უ-ს პატიმრობა, ხოლო ა.ნ.-ს გირაო 15 000 ლარის ოდენობით შეუფარდა.საქართველოს პროკურატურამ თელავის რაიონული სასამართლოს გადაწყვეტილება, რომლითაც ა.ნ.-ს აღკვეთის ღონისძიების სახით გირაო შეეფარდა, სააპელაციო წესით, ბრალდებულისთვის პატიმრობის შეფარდების მოთხოვნით გაასაჩივრა. თბილისის სააპელაციო სასამართლოს საგამოძიებო კოლეგიამ ბრალდების მხარის საჩივრის საფუძველზე, ბრალდებულ ა.ნ.-ს აღკვეთის ღონისძიების სახით პატიმრობა შეუფარდა" - ნათქვამია პროკურატურის განცხადებაში.