ადამიანის უფლებებისა და თავისუფლების კუთხით ქვეყანაში არსებული მდგომარეობის შესახებ სახალხო დამცველის 2013 წლის ანგარიშში რელიგიური უმცირესობების უფლებების დარღვევის საკითხი, ასევე ხუდონისა და შუახევის ჰიდროელექტროსადგურების მშენებლობის საკითხებიც მოხვდა.

ნანუაშვილის განცხადებით, რელიგიური უმცირესობების დაცვისთვის სამართალდამცავებმა დროულად ვერ იმოქმედეს.

როგორც უჩა ნანუაშვილმა ანგარიშის პრეზენტაციაზე განაცხადა, მისი აპარატი ჰესების მშენებლობების კანონიერებასა და ადგილობრივ მოსახლეობის უფლებების სავარაუდო დარღვევის საკითხს სწავლობს.

"სახალხო დამცველის აპარატი სწავლობს მესტიის რაიონის სოფელ ხაიშში დაგეგმილი ხუდონის და აჭარაში დაგეგმილი შუახევის ჰიდროელექტროსადგურების კასკადის მშენებლობის კანონიერების, ასევე ადგილობრივი მოსახლეობის უფლებების სავარაუდო დარღვევის საკითხებს. სახალხო დამცველის პირველადი შეფასებით, არსებობს საფუძვლიანი კითხვები ხუდონჰესის მშენებლობისთვის კანონმდებლობით დადგენილი პროცედურების დაცვასთან დაკავშირებით.

სახალხო დამცველის აპარატის მიერ მოპოვებული ინფორმაციის მიხედვით, ამ ეტაპზე დასრულებული სახით არ არსებობს გარემოზე ზემოქმედების შეფასების ანგარიში, ხოლო ეკოლოგიური ექსპერტიზის დასკვნის მოსამზადებლად კი ადმინისტრაციული წარმოებაც არ არის დაწყებული. მიუხედავად ამისა, პოლიტიკური თანამდებობის პირების მხრიდან კეთდება საჯარო განცხადებები ჰესის აშენების გარდაუვალობის თაობაზე", - განაცხადა უჩა ნანუაშვილმა.

2013 წლის ანგარიშს სახალხო დამცველის აპარატი პარლამენტს მარტში წარუდგენს.