"მთავარი არხის" გენერალური დირექტორის, ნიკა გვარამიას საქმეზე ბრალდების მხარის მოწმე დაიკითხა - ის ერთ-ერთი სარეკლამო სააგენტოს ხელმძღვანელი იყო.

სახელმწიფო ბრალდების მტკიცებით, მოწმემ სასამართლოს საქმესთან დაკავშირებით მნიშვნელოვანი ინფორმაცია მიაწოდა.

"დაცვის მხარე ყოველთვის აპელირებდა, რომ ვინაიდან სამშენებლო კომპანიას არ ჰქონდა შესაბამისი სახსრები, რათა რეკლამის საფასური გადაეხადათ, ამის სანაცვლოდ მათ მიიღეს საკუთრებაში საცხოვრებელი ბინა, თუმცა დღეს ჩვენ წარვუდგინეთ მოწმეს დოკუმენტაცია, რომლითაც დასტურდება, რომ აღნიშნულ კომპანიას გააჩნდა საკუთარი სახსრები და სწორედ თანხობრივად მოხდა ფულის გადახდა სარეკლამო სააგენტოსთვის და დაცვის მხარის ეს არგუმენტები, აღნიშნული მოწმის ჩვენებით და წარდგენილი დოკუმენტებით სრულად გაბათილდა," - აცხადებს პროკურორი ზვიად გუბელაძე.

გვარამიას ადვოკატის განცხადებით, დღევანდელ პროცესზე დაკითხულმა მოწმემ ნათლად დაადასტურა, რომ არაფერი უკანონო არ მომხდარა.

"რეალურად, მოწმემ განაცხადა, რომ დავალიანება ნამდვილად არსებობდა, კერძოდ, სამშენებლო კომპანიას ჰქონდა დავალიანება. "სეილსჰაუსი" და თვითონაც სარეკლამო სააგენტო ცდილობდნენ ამ დავალიანების მიღებას, თუმცა ვერ მოახერხეს ეს და შემდეგ მოხდა შეთანხმება, რომ უძრავი ქონებით მომხდარიყო ამ ვალდებულების გაქვითვა. არაფერი, ბუნებრივია, ამაში უკანონო არ არის და ესეც ნათლად და ცალსახად დაადასტურა მოწმემ", - ამბობს ადვიკატი დიმიტრი საძაგლიშვილი.

ცნობისთვის, "მთავარი არხის" გენერალურ დირექტორს პროკურატურა ედავება ჯერ კიდევ "რუსთავი 2"-ის დირექტორობის დროს, სამაუწყებლო კომპანიის კანონიერი ინტერესების საწინააღმდეგოდ უფლებამოსილების ბოროტად გამოყენებასა და მისი კუთვნილი დიდი ოდენობითთანხის სამსახურეობრივი მდგომარეობით გამოყენებას.