არასამთავრობო ორგანიზაციებმა სასამართლო რეფორმის კონცეფციის დოკუმენტი მოამზადეს, სადაც მართლმსაჯულების მიკერძოებულ საქმიანობასა და კლანის ინტერესების გატარებაზეა საუბარი.

დოკუმენტში ნათქვამია, რომ სასამართლო სისტემა მწვავე კრიზისშია და ხელისუფლება ამის შესაცვლელად არაფერს აკეთებს:

"დღესდღეობით სისტემა კლანის ინტერესებს ემსახურება, რამაც, საბოლოოდ, სასამართლოს დამოუკიდებლობისა და საზოგადოებრივი ნდობის მკვეთრი ვარდნა გამოიწვია, ხოლო სასამართლო პოლიტიკური ანგარიშსწორების იარაღად აქცია" - ნათქვამია დოკუმენტში.

სასამართლოს რეფორმის კონცეფციის დოკუმენტს შვიდი არასამთავრობო ორგანიზაცია აწერს ხელს:

საერთაშორისო გამჭვირვალობა-საქართველო

საქართველოს დემოკრატიული ინიციატივა

ღია საზოგადოების ფონდი

ინფორმაციის თავისუფლების განვითარების ინსტიტუტი

სამართლიანი არჩევნებისა და დემოკრატიის საერთაშორისო საზოგადოება

ადამიანის უფლებათა ცენტრი

პარტნიორობა ადამიანის უფლებებისთვის

დოკუმენტი მოიცავს მთელ რიგ საკითხებს, რომლებიც ყველაზე მეტად სჭირდება სასამართლო რეფორმას:

იუსტიციის უმაღლესი საბჭოს დაკომპლექტება;

უზენაესი სასამართლოს მოსამართლეთა დანიშვნა;

მოსამართლეთა ინდივიდუალური, ფუნქციური და ინსტიტუციური დამოუკიდებლობა;

სასამართლოს ჩაკეტილობა, ახალი ნაკადის შედინება და მოსამართლეთა დანიშვნა;

გადატვირთულობა, მოსამართლეთა რაოდენობა და სასამართლოს აპარატის შრომის ანაზღაურება;

სასამრთლოს თავმჯდომარეები;

ნაფიც მსაჯულთა სასამართლო;

ენჯეოების განცხადებით, დოკუმენტი დაეხმარება გადაწყვეტილების მიმღებ პირებს საკანონმდებლო ცვლილებების იმგვარად დაგეგმვაში, რომ მაქსიმალურად აღმოიფხვრას მართლმსაჯულების სისტემაში არსებული ინსტიტუციური თუ ფუნქციური პრობლემები.