სასჯელაღსრულების დაწესებულებებში მოშიმშლეთა რაოდენობამ იკლო, ამის შესახებ სუბარის უწყების მიერ გავრცელებულ განცხადებაშია ნათქვამი.

მათი ინფორმაციით, სასჯელაღსრულების დეპარტამენტის დაწესებულებებში 2013 წლის 9 დეკემბრის მდგომარეობით 128 მსჯავრდებული და ბრალდებული შიმშილობს, მათი ერთი ნაწილის მოთხოვნა ხარვეზების დამდგენი კომისიის შექმნა და 223-ე პრიმა მუხლის გაუქმებაა, მსჯავრდებულების მეორე ნაწილი კი საქმეების გადახედვას ინდივიდუალურად მოითხოვს.

128 მსჯავრდებულიდან გარკვეული ნაწილი პრეტენზიას გამოთქვამს იმასთან დაკავშირებით, რომ შეკრებითობის წესის გაუქმება ყველა მსჯავრდებულზე თანაბრად არ აისახა. 2013 წლის 17 აპრილს სისხლის სამართლის კოდექსში შესული ცვლილების საფუძველზე, განაჩენთა ერთობლიობის შემთხვევაში შეკრებითობის ან შთანთქმის პრინციპის გამოყენებაზე გადაწყვეტილებას სასამართლო იღებს.

ყველა მოშიმშილე მსჯავრდებულის ჯანმრთელობის მდგომარეობა კონტროლდება და თითეულ მათგან სამედიცინო პერსონალისგან სათანადო ყურადღება ექცევა. სასჯელაღსრულების, პრობაციისა და იურიდიული დახმარების საკითხთა სამინისტრო აღნიშნულ მსჯავრდებულებს მოუწოდებს გაუფრთხილდნენ საკუთარ ჯანმრთელობას, შეწყვიტონ შიმშილობა და დაელოდნონ შესაბამისი სახელმწიფო სტრუქტურების გადაწყვეტილებას.

შეგახსენებთ, რომ სხვადასხვა სასჯელაღსრულების დაწესებულებებში პატიმრები 19-ე დღეა შიმშილობენ.