,,რედისონში“ მართლმსაჯულების გამჭვირვალეობაზე მსჯელობენ

სამართალი - 13:31, 17 Nov, 2012

432

შეხვედრას ესწრებიან პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე ეკა ბესელია, იუსტიციის მინისტრის მოადგილე ალექსანდრე ბარამიძე, მთავარი პროკურორი არჩილ კბილაშვილი, იურისტები, ადამიანის უფლებათა დამცველები და ადვოკატები.შეხვედრას ასევე ესწრება გაერო-ს განვითარების პროგრამის ხელმძღვანელი საქართველოში ჯეიმი მაკგოლდრიკი.
მაკგოლდრიკმა აღნიშნა, რომ საერთაშორისო ორგანიზაციები მზად არიან, მოისმინონ, თუ რა ცვლილებები სურს ქართვლ საზოგადოებას და მთავრობას მართლმსაჯულების თვალსაზრისით.
მრგვალი მაგიდის მონაწილეები მსჯელობენ სამართლიანი სასამართლოს უფლების, დაზარალებულთა უფლებების დაცვისა და ამინისტიის საკითხებზე. მართლმსაჯულების ხარვეზების გამოსწორების სამართლებრივი მექანიზმების შესახებ მოხსენებას კითხულობს იურიდიული მეცნიერებათა დოქტორი მერაბ ტურავა. მისი თქმით, 310-ე მუხლით პროკურატურაში ორი ათასამდე საჩივარია შესული.
მრგვალი მაგიდის მეორე ნაწილში განხილული იქნება კანონპროექტი "ამნისტიის შესახებ", რომელსაც ეკა ბესელია წარადგენს.
დავით უსუფაშვილმა სიტყვით გამოსვლისას სამართლებრივი პროცედურების დაცვის აუცილებლობაზე ისაუბრა. მისი თქმით, ყოფილი ხელისუფლების წარმომადგენლები ამის შესახებ ქილიკებდნენ და აცხადებდნენ, რომ მათ პროცედურების დაცვისთვის არ სცალიათ.