„ბერკუტელებო“, დაჰკარით ,,ჰელმუტელებს!“- ამ სათაურით სტატიას ,,ასავალ-დასავალი“ აქვეყნებს.

„ვინ არიან და სად არინ ჰელმუტელები? -ბევრი რომ აღარ გავაგრძელო, დღეს ქართველი ჰელმუტელები კიევში არიან, რევოლუციურ ტრიბუნაზე დგანან და მხარს უჭერენ უკრაინის ევროპულ კურსს“- წერს ჟურნალისტი დიტო ჩუბინიძე.

ჟურნალისტი განმარტავს, თუ რას ნიშნავს სიტყვა ,,ჰელმუტელი“ და აღნიშნავს, რომ ამ ტერმინის გამომგონებელს ეს ,,ნოუ ჰაუ“ სამსახურის დაკარგვად დაუჯდა:

„ზეზვა მედულაშვილთან გახლავთ დაკავშირებული, ასე მან მოიხსენია ცნობილი ქალბატონი ,რომელიც თურმე გერმანიის ყოფილი კანცლერის ჰელმუტ კოლის ფანი ყოფილა, როგორც ,,ლენინელი“ , ,,სტალინელი“ არსებობს, ასეთივე ტერმინია ,,ჰელმუტელი“- განმარტავს ,,ასავალ-დასავალის“ ჟურნალისტი.

„გიორგი ბარამიძე, ცნობილი მკვლელი და მიხეილ სააკაშილის ჯიბის ცერბერი, კობა ხაბაზი, გიორგი ვაშაძე, სერგო რატიანი, და ავადსახსენებელი ზურაბ ადეიშვილის საყვარელიძე- დიდი დავითი, რომლებიც კიევში სააკაშვილის მეთაურობით ახალი ,,ფორთოხლისფერი რევოლუციის“ მოსაწყობად ემზადებია, სწორედ ჰელმუტელები არიან!“ -წერს ჟურნალისტი.

ჟურნალისტი წუხს, რომ საქართველოში ამ ჩამოთვლილი პირების დასჯა ვერ მოხერხდა და იმედს გამოთქვამს, რომ ამას ,,ბერკუტი“ გააკეთებს:

„ბიძინა ივანიშვილმაც არაერთხელ თქვა, რომ ხელისუფლება მოწადინებულია ,,ნაცმოძრაობას“ სახე შეუნარჩუნოს, რაც იმას ნიშნავს, რომ საქართველოს დამაქცევარ სექტას უბატონოდ კაცი ხმას ვერ გასცემს. ამ სიტუაციაში გამოსავალი ერთია - ისევ ბერკუტელებმა უნდა გვიშველონ!“- წერს ჟურნალისტი ჩუბინიძე.

ჟურნალისტი იმედს გამოთქვამს, რომ კიევში ,,ბერკუტი“ ,,ნაციონალური მოძრაობის“ წევრებს ,,აბურთავებს“. სტატიის ავტორი ,,ბერკუტს“ ასწავლის, როგორ გაუსწორდნენ იქ ჩასულ ,,ნაციონალებს“. მოუწოდებს ჩაყარონ დილეგში, აწამონ, გააუპატიურონ და ეს ყველაფერი ფირზე ასახონ და ტყეში დამარხონ ვიდეომასალა.

თუ ცემისას რომელიმე შემოაკვდებათ, ჟურნალისტი ურჩევს, გვამები საფუნთუშის სახურავზე შემოაწყონ ან მდინარე დნეპრში ჩაყარონ. ამ სტატიის დასაწყისში ჟურნალისტი დიტო ჩუბინიძე მკითხველს უხსნიდა, რომ სტატიის სათაურის გამო ცუდი არაფერი ეფიქრათ, რადგან რედაქცია პატივს სცემდა მკითხველსა და მათ თვალსა და ყურს არანაირ სიბინძურეს არ გააკარებდა.

„პატივცემულო მკითხველო, ეს ერთი შეხედვით სკაბრეზული სათაური ნუ დაგაბნევთ და ცუდს ნურას იფიქრებთ! ჩვენ იმდენად დიდ პატივს ვცემთ თქვენს მაღალ გემოვნებას, გამორიცხულია, თქვენს თვალსა და ყურს სიბინძურე გავაკაროთ! სინამდვილეში, ყველაფერი სულ სხვაგვარად გამოიყურება, ვიდრე სათაურიდან ჩანს! საქმე ის გახლავთ, რომ კიევში, შესაძლოა უკრაინელ ბერკუტელებსა და ქართველ ჰელმუტელებს შორის სისხლი დაიღვაროს!“- განმარტავს ჟურნალისტი სტატიის ,,სკაბრეზული“ სათაურის მიზეზს.