ექსპერტიზის ეროვნულ ბიუროსა და სომხეთის წარმომადგენლებს შორის 2013 წლის მარტში გაფორმებული ურთიერთთანამშრომლობის მემორანდუმის ფარგლებში სომხური დელეგაციის წევრები ტრენინგს გაივლიან.

ტრენინგი ორი კვირა გაგრძელდება და მისი დასრულების შემდეგ მონაწილეებს სერტიფიკატები გადაეცემათ.

ტრენინგის ფარგლებში სომხეთის საექსპერტო დაწესებულების წარმომადგენლები ანდრანიკ მანველიანი, არპინე ნავასარდიანი და ანა ჰოკჰანნისიანი დნმ ექსპერტიზის ჩატარების სპეციფიკას გაეცნობიან. ტრენინგი შემდეგ საკითხებს მოიცავს:

•             დნმ ლაბორატორიაში მუშაობის უსაფრთხოების წესები;

•             კონტამინაციის (სხვა დნმ-თი დაბინძურება) პრევენცია;

•             დნმ ნიმუშების აღება, შენახვა და გამოყენება;

•             დნმ ანალიზის პროცედურები საერთაშორისო სტანდარტების შესაბამისად;

•             დნმ შედეგების ინტერპრეტაცია;

•             სასამართლოზე დნმ ექსპერტიზასთან დაკავშირებით ჩვენების მიცემის უნარ-ჩვევები.

ექსპერტიზის ეროვნული ბიურო რეგიონში წამყვანი საექსპერტო დაწესებულებაა. თანამედროვე, მაღალტექნოლოგიური მატერიალური ბაზისა და კვალიფიციური ექსპერტების დამსახურებით, ბიუროში ისეთი კვლევები ტარდება, რომლებიც ხშირ შემთვევაში უნიკალურია რეგიონში.

 სსიპ ლევან სამხარაულის სახელობის სასამართლო ექსპერტიზის ეროვნული ბიუროსთვის მნიშვნელოვანია სხვა ქვეყნების გამოცდილებისა და ცოდნის გაზიარება ექსპერტიზის ყველა დარგში და თავადაც მზად არის თავისი გამოცდილება მეზობელი ქვეყნების კოლეგებს გაუზიაროს.

www.expertiza.gov.ge