პატიმართა წამების ბრალდებით დაკავებულ დავით ჩხატარაშვილს ბრალი ამ დრომდე არ წარსდგენია.

ჩხატარაშვილი წინასწარი დაკავების იზოლატორში იმყოფება და უკვე მოინახულა ადვოკატმა, რომელმაც მას პირადი ნივთები მიაწოდა. ამ დრომდე უცნობია თავად ჩხატარაშვილის პოზიცია დაკავების მიზეზთან დაკავშირებით.

დავით ჩხატარაშვილის დაკავების სესახებ განცხადება მთავარმა პროკურატურამ გუშინ გააკეთა. ჩხატარაშვილი ყოფილი მთავარი პროკურორის მურთაზ ზოდელავას მოადგილე იყო. 

შეგახსენებთ, რომ 2013 წლის მაისში საქართველოს პრეზიდენტმა მიხეილ სააკაშვილმა დავით ჩხატარაშვილი გია ხუხაშვილთან ერთად, ბიზნესზე ზეწოლაში დაადანაშაულა. მაშინ გია ხუხაშვილმა, რომელიც პრემიერმინისტრის მრჩეველი იყო, ჩხატარაშვილთან ნაცნობობა და კავშირები უარყო, თუმცა, მისი დაკავების შემდეგ განაცხადა, რომ რამდენჯერმე შეხვდა ჩხატარაშვილს, ესაუბრა და მისგანაც მიიღო ინფორმაცია სასჯელაღსრულების ადგილებში არსებული მდგომარეობის შესახებ.