ჟურნალისტები და მორაგბეები, ქალთა მიმართ ძალადობის წინააღმდეგ, ამხანაგურ მატჩს გამართავენ

საზოგადოება - 14:06, 07 Dec, 2013

1913

7 დეკემბერს, 20:00 საათზე რაგბის საწვრთნელი ბაზა ,,შევარდენზე“, ქართველი ჟურნალისტები და მორაგბეები ქალთა მიმართ ძალადობის წინააღმდეგ ამხანაგურ მატჩს გამართავენ. ამ თამაშით მედიის წარმომადგენლები და მორაგბეები გაეროს გენერალური მდივნის ბან კი მუნის კამპანიას „გავერთიანდეთ ქალთა მიმართ ძალადობის წინააღმდეგ“ მხარდაჭერას გამოუცხადებენ.

“დაუშვებელია ძალადობა ქალთა და გოგონათა მიმართ. ჩვენ, საქართველოს მორაგებთა ეროვნული ნაკრები, მოვუწოდებთ რაგბის ყველა გულშემატკივარს და ზოგადად მამაკაცებს, არასოდეს ჩაიდინონ, მოითმინონ და დაუშვან ძალადობა ქალთა და გოგონათა მიმართ“,- აცხადებს საქართველოს მორაგბეთა ეროვნული ნაკრების მთავარი მწვრთნელი მილტონ ჰეიგი.

გაეროს გენერალური მდივნის კამპანიის „გავერთიანდეთ ქალთა მიმართ ძალადობის წინააღმდეგ“ ფარგლებში, გაეროს ქალთა ორგანიზაციის მიერ დაწესებულია საუკეთესო მოთამაშის ჯილდო, რომელიც მატჩის დასასრულს სპეციალური ჟიურის მიერ არჩეულ საუკეთესო მოთამაშეს გადაეცემა.

ამხანაგური მატჩი ქალთა მიმართ ძალადობის საწინააღმდეგო 16 დღიანი კამპანიის ფარგლებში ტარდება. კამპანია 25 ნოემბერს დაიწყო და 10 დეკემბერს დასრულდება.