ემზარ კვიციანი, რომელიც კოდორის ხეობაში პრეზიდენტის ყოფილი რწმუნებული და ადგილობრივ მოხალისეთა რაზმის „მონადირეს“ ლიდერი იყო, ახალ ხელისუფლებას მის მიმართ გულგრილობაში ადანაშაულებს და ამბობს, რომ ზუსტად იგივე ხდება, რაც წინა ხელისუფლების დროს ხდებოდა:

„ბატონი პრეზიდენტი გიორგი მარგველაშვილი არჩევნებამდე შეხვდა ჩემს დას და უთხრა, რომ პირველი, რითაც ჩემი საქმიანობა დაიწყება, ეს ემზარის საქმე იქნებაო. ჯერჯერობით არაფერი ისმის, ერთი მესიჯი მაინც ხომ უნდა ყოფილიყო ხელისუფლებიდან, რატომღაც თავს იკავებენ. მგონია, რომ ეს არ არის შიდა პრობლემა. უცხოეთიდანაა მოთხოვნა იმისა, რომ არ დავბრუნდე საქართველოში. თუ ხელისუფლების ნება იქნება საქართველოში დავბრუნდები.

ჩამოვალ ლეგალურად, ან ნებისმიერ ქართულ საკონსულოში მივალ და ჩავბარდები“, - აცხადებს ემზარ კვიციანი.

მისივე თქმით, ბევრი რამ იცის, რისი თქმაც აუცილებელია კოდორის ხეობასთან დაკავშირებით:

„ბევრი რამ ვიცი, რასაც აკეთებდნენ უცხოელები ჩვენს ქვეყანაში და რითაც მოახერხეს კოდორის ხეობის ჩაბარება. ახლა ჩვენზე ეკონომიკური სიდუხჭირით აპირებენ ზეწოლის მოხდენას.

ჰკითხეთ ირაკლი ალასანიას, კოდორის ჩაბარებამდე 2 კვირით ადრე რატომ იყო კონდოლიზა რაისთნ ერთად აფხაზეთში ფარულად ჩასული. ეს ინფორმაცია გააჟღერეს თავად აფხაზებმა. ეს საიდუმლო ვიზიტი იყო“, - ამბობს ემზარ კვიციანი.