რეპორტაჟი ოკუპირებული ტერიტორიებიდან (ფოტო)

საზოგადოება - 16:08, 05 Dec, 2013

4057

საოკუპაციო რეჟიმმა დიცის, დვანის და ღოღეთის შემდეგ გორის მუნიციპალიტეტის სამი სოფლის ქვეშის, ციცაგიაანთკარის, ახრისის 2 -ად გაყოფა დაიწყო.
რუსმა ე.წ. მესაზღვრეებმა სამივე სოფელში აბრები დაამონტაჟეს, რომელზეც გაუმართავ ქართულ, რუსულ და ინგლისურ ენებზე წერია, რომ სახელმწიფო საზღვარია და გადაადგილება იკრძალება. რუსების მიერ დამონტაჟებულმა აბრებმა ქვეშის მოსახლეობას პრობლემები შეუქმნა. როგორც ადგილობრივები "ნიუპოსტთან" საუბრისას აღნიშნავენ, დამონტაჟებული აბრების მიღმა მათი კუთვნილი მიწის ნაკვეთები და ხეხილის ბაღები ექცევა. "ნაკვეთები იქით ჰყვება ჩვენ კი აქეთ ვრჩებით, რა გვეშველება? ვინ რას მოგვცემს? აღარ შეგვიძლია დავიღალეთ ხალხი. ჯერ ჩვენს ბაღებში აქამდეც შიშით დავდიოდით ხან ვის დაიჭერდნენ ჩვენი სოფლიდან საზღვარი გადაკვეთეო ხან ვის. ამ ზაფხულს ჩემს მეზობელს აღებული მოსავალი წაართვეს. ბაღში შეუვარდნენ და წაართვეს", - აცხადებს ქვეშის მკვიდრი გიული ელიზბარაშვილი.

"42 ჰექტარი საფრთხის ქვეშ არის ყოველდღე ველოდებით ან დღეს დაიწყებენ მავთულხლართების გავლებას ან ხვალ და მერე ჩათვალოთ, რომ უნდა დავრჩეთ ყველაფრის გარეშე. რუსებმა სოფელში რამოდენიმე წლის წინაც დაამონტაჟეს სოფელში ბოძები, მერე რაღაცა მოლაპარაკებები იყო და ისევ ამოიღეს", - ამბობს ვალერი დარბაიძე.

3 სოფელს, სადაც რუსებმა აბრები დაამონტაჟეს, ოკუპირებული ზემო არცევი ესაზღვრება სწორედ ზემო არცევში რუსები რამდენიმე დღეა, სატელეფონო ანძას აშენებენ, რაც ადგილობრივების აზრით, შესაძლოა, ახლომდებარე სოფლებისთვის დამატებითი პრობლემაც გახდეს. მათი თქმით, სოფელში გავრცელდა ხმები, რომ ზემოთ აღნიშნული ანძა ე.წ. სიგნალის ჩამხშობის ფუნქციასაც შეასრულებს. დღეს დილიდანე.წ. მესაზღვრეები ოკუპირებული ზემო არცევიდან მაქსის უბნამდე დამაკავშირებელ ხიდს აშენებენ "ნიუპოსტმა" აღნიშნული ფოტომასალის გადაღება შეძლო.