2 დეკემბერს, ისლანდიის პოლიციამ ეჭვმიტანილი ცეცხლსასროლი იარაღით მოკლა. ქვეყნის შინაგან საქმეთა მინისტრმა, სავარაუდო დამნაშავის დაკავების ოპერაციის დროს მკვლელობას, „უპრეცედენტო შემთხვევა“ უწოდა.

2 დეკემბერს დილას, 50 წლის მამაკაცმა, რეიკიავიკში, საკუთარ ბინაში სროლა დაიწყო. პოლიციამ სახლის მცხოვრებლების ევაკუირება მოახდინა; შემდეგ სამართალდამცავი ორგანოების თანამშრომლები შეეცადნენ მსროლელთან მოლაპარაკებას. მისი დარწმუნება, რომ იარაღი დაეგდო, ვერ შეძლეს. პოლიციამ ბინაში ცრემლსადენი გაზი შეუშვა. მამაკაცმა საპასუხოდ ფანჯრებიდან მანქანებს დაუწყო სროლა. მაშინ ისლანდიის სპეც-რაზმმა, რომელსაც არაოფიციალურად „ვიკინგების რაზმს“ ეძახიან, შტურმი გადაწყვიტა. როგორც კი პოლიციელები ბინაში შევდნენ, ატყდა სროლა. ერთ-ერთი სპეცრაზმელი მსუბუქად დაიჭრა, ეჭვმიტანილი კი საავადმყოფოში დაიღუპა.

ვინაიდან, ეს ქვეყნის, რომელმაც დამოუკიდებლობა 1944 წელს მიიღო, ისტორიის მანძილზე პოლიციის მიერ მოკლული პირველი ეჭვმიტანილია, შინაგან საქმეთა სამინისტრომ მწუხარება გამოთქვა დაღუპულის ნათესავებისა და ახლობლების მიმართ და ბოდიში მოუხადა მათ. პოლიციელებმა, რომლებმაც ეჭვმიტანილს ესროლეს, ფსიქოლოგიურ დახმარებას მიმართეს. ამ მოვლენით აღელვებული მოქალაქეებისთვის კი, ადგილობრივ ეკლესიაში მღვდლებთან და ფსიქოლოგებთან შეხვედრა მოუწყეს.

ისლანდიაში დაახლოებით 320 ათასი ადამიანი ცხოვრობს. ყოველწლიურად აქ რამდენიმე მკვლელობა ხდება. 1999-2009 წლებში განზრახ მკვლელობების რაოდენობა ისლანდიაში არ აღემატებოდა 1,9-ს 100 ათას კაცზე. შედარებისთვის, აშშ-ში იმავე პერიოდის ეს მაჩვენებელი ხუთიდან შვიდამდე თამაშობს, ხოლო რუსეთში 11,2-დან 30,7-მდე ფიქსირდება.

საინტერესოა, რომ ქვეყნის 300 ათასი მცხოვრების მფლობელობაში 90 ათასი ერთეული იარაღია.