სიღნაღში, ლოლაშვილის ქუჩაზე, პოლიციის რაიონული სამმართველოს შენობიდან დაახლოებით 50 მეტრში, მაღაზია გაქურდეს. ინფორმაციას ადგილობრივი მედიასაშუალება ტელეკომპანია "გურჯაანი" ავრცელებს. როგორც წყარო მოსახლეობაზე დაყრდნობით იუწყება, ეს პირველი შემთხვევა არ არის, როცა ქალაქის ცენტრში ქურდობები ხდება.

აღნიშნული საქმე შინაგან საქმეთა სამინისტროს მიერ გახსნილია. როგორც "ნიუპოსტს" შსს-დან აცნობეს, დანაშაულთან დაკავშირებით დაკავებულია 1991 წელს დაბადებული ლევან ი. სამართალდამცველებმა მიღებული ოპერატიული შეტყობინების საფუძველზე მოახდინეს მისი დაკავება, თბილისში, ვარკეთილის მასივში. ჩხრეკისას შსს-ს თანამშრომლებმა მოპარული ნივთები და კომპიუტერი ამოიღეს.