პროკურატურა ბაჩო ახალაიასთან დაკავშირებით განცხადებას ავრცელებს

სამართალი - 11:29, 05 Dec, 2013

6467

მთავარი პროკურატურა ბაჩო ახალაიასთან და მასთან ერთად ბრალდებულ ყოფილ მაღალჩინოსნებთან დაკავშირებით განცხადებას ავრცელებს. "ნიუპოსტი" ფარცხალაძის უწყების მიერ გავრცელებულ განცხადებას უცვლელად გთავაზობთ: "თბილისის სააპელაციო სასამართლომ ბრალდების მხარის საჩივრის საფუძველზე, ბაჩანა ახალაიას, გიორგი კალანდაძის, ალექსანდრე გორგაძის, ზურაბ შამათავას და მერაბ კიკაბიძის საქმეზე ნაწილობრივ გამამტყუნებელი განაჩენი გამოიტანა.
სააპელაციო სასამართლომ დადგენილად მიიჩნია ის ფაქტი, რომ 2010 წლის 18 თებერვალს, სენაკში, მე-2 ქვეითი ბრიგადის ტერიტორიაზე გენერალური შტაბის ყოფილი უფროსი გიორგი კალანდაძე სიტყვიერ და ფიზიკურ შეურაცხყოფას აყენებდა მის ხელქვეით სამხედრო მოსამსახურეებს. აღნიშნულიდან გამომდინარე, სასამართლომ გიორგი კალანდაძე დამნაშავედ ცნო სამხედრო სამსახურის წინააღმდეგ ჩადენილი დანაშაულისათვის, სასჯელის სახედ მიუსაჯა სამხედრო პირის სამსახურებრივი შეზღუდვა და 2012 წლის 28 დეკემბრის „ამნისტიის შესახებ‘‘ საქართველოს კანონის საფუძველზე გაათავისუფლა დანიშნული სასჯელისაგან.

სასამართლომ გამამტყუნებელი განაჩენი გამოიტანა სერჟანტ ალექსანდრე გორგაძის და ვაზიანის მე-4 ქვეითი ბრიგადის ყოფილი მეთაურის ზურაბ შამათავას მიმართაც, სამსახურებრივი უფლებამოსილების გადამეტებით ჯარისკაცების პირადი ღირსების შეურაცხყოფისა და ცემის ფაქტებზე. ისინი ცნობილ იქნენ დამნაშავედ საქართველოს სისხლის სამართლის კოდექსის 333-ე მუხლის მე-3 ნაწილის ’’ბ’’ და ’’გ’’ ქვეპუნქტებით გათვალისწინებული დანაშაულისათვის და სასჯელის სახედ და ზომად განესაზღვრათ 5(ხუთი) წლით თავისუფლების აღკვეთა. 1(ერთი) წლით ჩამოერთვათ საჯარო სამსახურში თანამდებობის დაკავების უფლება. 2012 წლის 28 დეკემბრის „ამნისტიის შესახებ‘‘ საქართველოს კანონით მათ შეუმცირდათ დანიშნული სასჯელი და, საბოლოოდ, განესაზღვრათ 3(სამი) წლითა და 9(ცხრა) თვით თავისუფლების აღკვეთა. მათვე 9(ცხრა) თვით ჩამოერთვათ საჯარო სამსახურში თანამდებობის დაკავების უფლება.

სააპელაციო სასამართლომ ძალაში დატოვა ბაჩანა ახალაიას, მერაბ კიკაბიძის, გაგა მკურნალიძის, მანუჩარ დარასელიასა და გიორგი კინწურაშვილის მიმართ პირველი ინსტანციის სასამართლოს მიერ გამოტანილი გამამართლებელი განაჩენი.
ბრალდების მხარე სააპელაციო სასამართლოს გადაწყვეტილებას უზენაესი სასამართლოს სისხლის სამართლის საქმეთა პალატაში გაასაჩივრებს", - ნათქვამია განცხადებაში.