მსახიობმა აზია არჯენტომ "ფორსაჟისა" და XXX-ის რეჟისორი რობ კოენი გაუპატიურებაში დაადანაშაულა. Il Corriere della Sera-სთან ინტერვიუში მან განაცხადა, რომ ეს 2002 წელს, XXX-ის გადაღებების დროს მოხდა.

"მე კოენზე პირველად ვსაუბრობ. მან მაიძულა GHB დამელია, მთელი ბოთლი ჰქონდა. მაშინ, სიმართლე რომ გითხრათ, არც კი ვიცოდი რა იყო ეს. დილით მის ლოგინში შიშველმა გავიღვიძე", - განაცხადა არჯენტომ.

მისი თქმით, მომხდარზე ის დეტალურად თავის ავტობიოგრაფიულ წიგნში "ველური გულის ანატომია" წერს, რომლის გაყიდვა 26 იანვარს დაიწყება.

რობ კოენის ადვოკატი მსახიობის ბრალდებებს უარყოფს.

აზია არჯენტო ერთ-ერთი პირველი მსახიობი იყო, რომელმაც პროდიუსერი ჰარვი ვაინშტეინი სექსუალურ ძალადობაში დაადანაშაულა და მოძრაობას #MeToo ჩაუდგა სათავეში.

GHB - გამა-ჰიდროქსიბუტიტრატი, არის უკანონო გაყიდვაში არსებული ნივთიერება, რომელმაც პოპულარობა ბოდიბილდერებში, ღამის კლუბებისა და წვეულებების მოყვარულებში ჰპოვა. GHB არის დეპრესანტი, რომელიც მოქმედებს ცენტრალურ ნერვულ სისტემაზე. იგი განიხილება, როგორც ძალის გამაძლიერებელი, ეიფორიანტი და აფროდიზიაკი.

ცნობილია, რომ GHB ერთ-ერთია იმ რამდენიმე აგენტიდან, რომლებსაც "პაემნის, ან გაუპატიურების" ნარკოტიკად მოიხსენიებენ. ცენტრალური ნერვული სისტემაზე დამთრგუნველი ეფექტის გამო, GHB შეიძლება იყოს ლეტალური, როდესაც მას ალკოჰოლთან ან სხვა დეპრესანტებთან ერთად გამოიყენებენ. აშშ–ის სურსათისა და წამლის ხარისხის კონტროლის საზოგადოებამ აკრძალა მისი წარმოება და გაყიდვა.