ადვოკატები სააპელაციო სასამართლოს გადაწყვეტილებას გაასაჩივრებენ

სამართალი - 15:15, 04 Dec, 2013

1960

სააპელაციო სასამართლოს გადაწყვეტილებას ალექსანდრე გორგაძისა და ზურაბ შამათავასთვის პატიმრობის შეფარდებასთან დაკავშირებით ადვოკატები უზენაეს სასამართლოში გაასაჩივრებენ. აღნიშნულის შესახებ ადვოკატმა მალხაზ ველიჯანაშვილმა ჟურნალისტებს განუცხადა.
"ჩვენ დარწმუნებული ვართ, რომ ის დანაშაული, რომელიც სააპელაციო სასამართლომ შამათავასა და გორგაძეს შეუფარდა, რეალური არ არის და უზენაესი სასამართლოს მხრიდან შეიცვლება, - განაცხადა მალხაზ ველიჯანაშვილმა.
სააპელაციო სასამართლომ, საქართველოს თავდაცვის ყოფილი მინისტრი, ბაჩო ახალაია გაამართლა. გაერთიანებული შტაბის ყოფილ უფროსს გიორგი კალანდაძეს კი თანამდებობის დაკავების უფლება 3 თვის ვადით აეკრძალა.
სასამართლომ ალექსანდრე გორგოძესა და ზურაბ შამათავას თავისუფლების 5 წლით აღკვეთა შეუფარდა, მათ საბოლოოდ სასჯელად 3 წელი 9 თვე განესაზღვრათ. ისინი დარბაზშივე დააკავეს. ამასთან, ორივე მათგანს 9 თვის განმავლობაში საჯარო სამსახურში თანამდებობის დაკავების უფლება აეკრძალათ.
საქმე ეხებოდა სამხედრო მოსამსახურეებისთვის სიტყვიერი და ფიზიკური შეურაცხყოფის მიყენების, თავისუფლების აღკვეთის ეპიზოდებსა და ზვიად აბესაძესთან დაკავშირებულ ეპიზოდს, როდესაც მას, პროკურატურის ინფორმაციით, სიტყვიერი და ფიზიკური შეურაცხყოფა მიაყენეს და თავისუფლება აღუკვეთეს.