გერმანიიდან რუსეთში დაბრუნებული ოპოზიციონერი ალექსეი ნავალნი პოლიციამ აეროპორტში საპასპორტო კონტროლის გავლის შემდეგ დააკავა.

პოლიციამ უარი თქვა განემარტა პოლიტიკოსისთვის, არის ის დროებით დაკავებული, თუ დაპატიმრებული. მასთან არ შეუშვეს ადვოკატი, რომელიც რუსეთში იმავე თვითმფრინავით ჩამოფრინდა.

ამავდროულად რუსეთის სასჯელაღსრულების ფედერალური სამსახური ავრცელებს განცხადებას, რომ 2021 წლის 17 იანვარს მოსკოვის აეროპორტ "Шереметьево"-ში დაკავებულ იქნა მოქალაქე ალექსეი ნავალნი, რომელზეც 2020 წლის 29 დეკემბრის შემდეგ, ე.წ. "გამოსაცდელი ვადის" არაერთჯერადი დარღვევის გამო ძებნა იყო გამოცხადებული.

"ა.ა. ნავალნის აღკვეთის ღონისძიებაზე გადაწყვეტილებას სასამართლო მიიღებს, ხოლო მის გამართვამდე იგი იქნება დაკავებული"- ნათქვამია განცხადებაში.