ისრაელის კონდიციონერების მწარმოებელმა კომპანია TADIRAN-მა გამოიგონა ჰაერის გამწმენდი, გამასუფთავებელი ტექნოლოგია, რომელიც ოთახებში ვირუსულ ნაწილაკებს, მიკრობებსა და ბაქტერიებს 99.9 %-იანი ეფექტურობით ანადგურებს. ამის შესახებ სტატიას აქვეყნებს ებრაული გამოცემა, Jerusalem post-ი.

ზემოხსენებულმა კომპანიამ 2020 წლის მაისში დაანონსა, რომ დაიწყო განვითარება ახალ სფეროებში, რომელთა მთავარი მიზანი იქნება დახურულ სივრცეებში ჰაერის დამუშავება და გაწმენდა.

2020 წლის ბოლოს კი კომპანია Tadiran-მა წარმოადგინა უახლესი ტექნოლოგიებით შექმნილი კონდიციონერები, რომლის მთავარ ფუნქციას წარმოადგენს ოთახში ჰაერის გაწმენდა, რომელსაც ის სადეზინფექციო ხსნარის მსგავსი ნივთიერების გამოფრქვევით ახდენს.

ახალი კონდიციონერი ჰაერში ტენიანობის ფონზე წარმოქმნის წყალბადის ზეჟანგს, რომელიც შემდეგ ოთახში გაბნეულ ვირუსებსა და ბაქტერიებს 99.9% ალბათობით კლავს. აღნიშნული ტექნოლოგიის ეფექტურობა კი უკვე შემოწმდა აშშ-ში, ამერიკის საჭმლისა და წამლის ადმინისტრაციის მიერ აღიარებულ ლაბორატორიაში, სადაც ხდება დაკვირვება, შესწავლა ბაქტერიებზე, ვირუსებსა და სოკოებზე.

„ჯანდაცვის მსოფლიო ორგანიზაციის მიერ ჩატარებული კვლევით დადგინდა, რომ ჩვენი საყოფაცხოვრებო ტერიტორია სახლებში 5-ჯერ უფრო მეტად დაბინძურებულია, ვიდრე გარე გარემოში. რამდენიმე წლის წინ ჩვენ გადავწყვიტეთ, რომ ვყოფილიყავით ლიდერები ჰაერის დამუშავებაში და სახლებში ჯანმრთელი გარემოს შექმნის პროცესში. დიდი ინვესტიციისა და 3 წლიანი განვითარების შემდეგ უდიდეს ტექნოლოგიურ წარმატებას მივაღწიეთ, რომელიც უზრუნველყოფს დახურულ სივრცეებში ჯანმრთელ და სუფთა ჰაერის შენარჩუნებას. ამჟამად ხდება ჩვენ მიერ დაპატენტებული ტექნოლოგიის მიწოდება და წარდგენა მსოფლიოს წამყვანი კონდიციონერების კომპანიებისთვის, რომლებშიც აღნიშნული მოვლენა ძალზე დიდ ინტერესს აღძრავს“ - განაცხადა Tadiran-ის აღმასრულებელმა დირექტორმა და კომპანიის საკონტროლო პაკეტის მეწილემ, მოშე მამრუდმა.