რუსეთის ბალტიის ზღვის სამხედრო ფლოტის ოფიცერმა, რომლის გვარიც არ სახელდება, ნაღმოსან ხომალდ "Беспокойный"-დან ორი ბრინჯაოსგან დამზადებული ძრავის პროპელერი მოიპარა, რომელთა ღირებულებაც 39 მილიონი რუსული რუბლია.

ამის შესახებ რუსეთის საგამოძიებო კომიტეტის სამხედრო განყოფილების წარმომადგენლებმა განაცხადეს. აღსანიშნავია, რომ მათი წონა ჯამში 26 ტონას აღემატება.

გამოძების თანახმად ოფიცერი მარტო არ მოქმედებდა, მას სხვა სამხედროები და სამოქალაქო პირებიც ეხმარებოდნენ. მათ ბრინჯაოს მოხსნეს და უფრო იაფი მეტალისგან დამზადებულით შეცვალეს.

"Беспокойный" უკვე ათეულ წელზე მეტია ზღვაში არ გასულა, ხოლო 2016 წლიდან ის კალინინგრადში, სარემონტო პორტში დგას და მასში სამხედრო მუზეუმის განთავსებას გეგმავდნენ.