გიორგი შაქარაშვილის საქმე - დაკავებული 3 პირი სასამართლო დარბაზიდან გაათავისუფლეს

სამართალი - 13:05, 11 Jan, 2021

1668

19 წლის ფეხბურთელის გიორგი შაქარაშვილის საქმეზე ბრალდებულ 3 პირს - საბა ჩხარტიშვილს, საბა გოგშელიძესა და ირაკლი წაქაძეს აღკვეთის ღონისძიების სახით შეფარდებული პატიმრობა გირაოს სანაცვლოდ შეეცვალა.

მოსამართლემ მათ 1000 ლარიანი გირაოს გადახდა დააკისრა.

გათავისუფლებულები ძალადობის ეპიზოდზე იყვნან დაკავებულები. უფრო კონკრეტულად "საბურთალოელებს" ბრალად ედებათ ძალადობა გახმაურებული საქმის პირველ ეპიზოდში. ისინი მხოლოდ ნარეკვავის აგარაკზე მომხდარ დაპირისპირებაში ფიგურირებენ.

საბა ჩხარტიშვილს, საბა გოგშელიძესა და ირაკლი წაქაძის მიმართ პრეტენზია არ ჰქონიათ გარდაცვლილი ფეხბურთელის ოჯახის წევრებსაც. საპროცესო შეთანხმებას დათანხმდა დაზარალებული ვახტანგ ჩიქოვანიც.

აქვე შეგახსენებთ, 19 წლის ფეხბურთელის გარდაცვალების საქმეზე, შსს-მ ჯგუფური ძალადობის ორგანიზების, მასში მონაწილეობის, თავისუფლების უკანონო აღკვეთისა და ორი ან მეტი პირის მიმართ ჯგუფური ძალადობის ბრალდებით, 26 ივნისს 17 ადამიანი დააკავა.

11 აგვისტოს პროკურატურამ შაქარაშვილის საქმეზე 5 პირს ბრალი დამამძიმებელ გარემოებებში განზრახ მკვლელობის მუხლით დაუმძიმა.

შეგახსენებთ, 23 ივნისს 4-დღიანი საძიებო სამუშაოების შემდეგ, მყვინთავებმა გიორგი შაქარაშვილის ცხედარი მდინარეში იპოვეს.

ავტორი: დავით ჯაბაშვილი