„ქართველები არ მიყვარს. ყველა მონათესავე ხალხებიდან ისინი ყველაზე ამბიციურები, უფრო ცბიერები არიან,“- ამბობს ჟურნალ „რეიტინგთში“ გამოქვეყნებულ ინტერვიუში რუსეთის ქალთა ფეხბურთის ნაკრების მეკარე,  წარმოშობით ქართველი ელვირა თოდუა.

თოდუა რუსეთში აფხაზეთის ომის შემდეგ, ოჯახთან ერთად ჩავიდა და ამის შემდეგ იქ ცხოვრობს:

რუსეთში რომ გადმოვედით, საშინლად გაგვიჭირდა. ლტოლვილები უცხო ქვეყანაში, საბუთების გარეშე... ცხრა წელი ნაქირავებ ბინებში დავწანწალებდით, დედ-მამა სამ-ოთხ სამუშაოზე დადიოდა, რომ ოჯახი გამოეკვება. რთულად ვცხოვრობდით,“- ამბობს სპორტსმენი.

მისი დედა რუსია, მამას კი ეროვნებად აფხაზი უწერია, თავად ელვირა კი ამბობს, რომ ის ქართველი არ არის, თუმცა ასე მოიხსენიებენ. მისი თქმით - მას მეგრული გვარი აქვს და არა ქართული:

„კავკასიურ ხასიათს - იმპულსურობას, შემტევობას - ამას ვერ დამალავ. მე ქართველი არ ვარ, თუმცა ხშირად ასე მომიხსენიებენ, რადგან მიაჩნიათ, რომ ქართული გვარია. სინამდვილეში თოდუა მეგრული გვარია, ეროვნება კი პასპორტში აფხაზი მიწერია. თუმცა, პრინციპში, ეს ერთი ხალხია - ქართველები, მეგრელები, აფხაზები. ასე რომ, თუ ვინმე ძალიან დაიჟინებს, არა, შენ ქართველი ხარო, - არ ვიუარებ.

როგორც უნდათ, ისე იფიქრონ. თუმცა ქართველები არ მიყვარს. ყველა მონათესავე ხალხებიდან ისინი ყველაზე ამბიციურები, უფრო ცბიერები არიან. თუმცა, რა თქმა უნდა, ეროვნება არაფერ შუაშია. ყველგან არიან კარგი და ცუდი ადამიანები,“- ამბობს რუსეთის ნაკრების მეკარე.