ფლორიდაში მამაკაცმა, რომელიც ახლა 36 წლისაა, 14 წლის წინ თავის ძმებთან ერთად, გაიტაცა და მოკლა შეყვარებული, რომელზეც ეჭვობდა, რომ მისგან ორსულად იყო. 16 წლის გოგონას მკვლელობისთვის, მამაკაცს ბრალი ცოტა ხნის წინ წაუყენეს. მისი მსხვერპლის ცხედარი 14 წლის წინ სავალი გზის გასწვრივ იპოვეს.

გამომძიებლების თქმით, არასრულწლოვანი გოგონა 2006 წლის 11 თებერვალს გაიტაცეს და მოკლეს. ბრალდებულმა მამაკაცმა პოლიციელებს განუცხადა, რომ ეგონა, რომ მისი შეყვარებული გოგონა ორსულად იყო და ურთიერთობის დასრულება სურდა.

ცხედრის გაკვეთის შედეგად დადგინდა, რომ 16 წლის გოგონა ორსულად არ იყო. პოლიციამ ასევე დასძინა, რომ სამი ძმა ამ საქმეზე ადრევე იყო ეჭვმიტანილი, მაგრამ დეტექტივებს მათთვის ბრალის წაყენებისთვის საკმარისი მტკიცებულება არ ჰქონდათ.

გარდაცვლილი გოგონას ოჯახის წევრები ამბობენ, რომ სამართალმა გვიან, მაგრამ მაინც იზეიმა.