ბიზბესმენი ვალერი გელაშვილი აცხადებს, რომ თუკი დღის წესრიგშია ავლაბრის საპრეზიდენტო რეზიდენციის გასხვისების საკითხი, ის აუცილებლად მას უნდა დაუბრონონ.

გაზეთ „კვირის პალიტრასთან“ ინტერვიუში გელაშვილი მასზე წინა ხელისუფლების დროს განხორციელებულ თავდასხმის დეტალებზე საუბრობს და ასახელებს პირს, რომელმაც მასზე ტავდასხმა დაგეგმა. გელაშვილის განცხადებით, ის ახალმა ხელისუფლებამ სპეცრაზმის უფროსად დანიშნა:

„ითქვა, რეზიდენცია უნდა გასხვისდესო. ავლაბარში პრეზიდენტურა თუ აღარ იქნება, აუცილებლად მოვითხოვ, დამიბრუნონ ჩემი ქონება. გასხვისების შემთხვევაში ის ადგილი თუ ვინმეს ეკუთვნის, პირველი მე ვარ“, - ამბობს ვალერი გელაშვილი და ტავდასხმის დეტალებზე გადადის:

„ხელისუფლებაში მოსულმა "ნაციონალურმა მოძრაობამ" რეზიდენციის მშენებლობა ჩემს კომპანიას დაავალა. თანხის ნაწილი რომ დავხარჯე, შევატყვე, ფულის გადახდას არ აპირებდნენ და ამაზე კონფლიქტიც მომივიდა უგულავასთან. ამის შემდეგ დაიწყო ყველაფერი - ჩემი ქონების ხელში ჩაგდებაც მოინდომეს და კუთვნილი ფულიც აღარ მომცეს. სახლი დავლუქე და ვილნიუსში იმ იმედით გავემგზავრე, რომ შეუთანხმებლად შიგ ვერავინ შევიდოდა.

ერთ დღეს ვიღაცამ დამირეკა და დამემუქრა, თუ დაბრუნდები, ტერორისტულ აქტს მოგიწყობთო.  მესმოდა, როგორ კარნახობდა უგულავა იმ კაცს, რა უნდა ეთქვა ჩემთვის. ჩამოვედი და მუქარა აასრულეს. სასიკვდილოდ მცემეს, სპეცრაზმელებში განსაკუთრებული სისასტიკით ოთხი კაცი გამოირჩეოდა.

ერთი მათგანი ის იყო, ვინც ტელეფონზე მესაუბრა. ცემის შემდეგ, გონება რომ დამეკარგა, საავადმყოფოში წამიყვანდნენ, ოპერაციას გამიკეთებდნენ და მაგიდაზე დამტოვებდნენ. ამიტომ თვითმფრინავი გამოვიძახე და საზღვარგარეთ გავფრინდი.  

ჩემზე თავდასხმის დამგეგმავი ვახტანგ ზუხბაია დღეს სპეცრაზმს ხელმძღვანელობს. თავის დროზე, "ნაციონალებმა" გაათავისუფლეს, ახალმა ხელისუფლებამ კი ისევ სპეცრაზმის უფროსად დანიშნა“, - ამბობს გაზეთ "კვირის პალიტრასთან" ინტერვიუში ბიზნესმენი.