ფსიქოლოგი „მიშიზმზე“: ამ დაავადების მკურნალობა სახელმწიფომ უნდა ითავოს

საზოგადოება - 14:14, 02 Dec, 2013

3623

რა არის ,,მიშიზმი“ - დაავადება თუ ფსიქიკური მდგომარეობა?- ამ სათაურით სტატიას გაზეთი ,,ქრონიკა“ აქვეყნებს.

ფსქოლოგი გივი მერაბიშვილი გაზეთთან ინტერვიუში ამბობს, რომ ეს ისეთივე მდგომარეობაა, როგორიც ,,სტალინიზმი“, ,,ზვიადისტობა“ და ა.შ. ფსიქოლოგი რჩევასაც აძლევს მათ, ვისაც ,,მიშიზმის“ მიმდევრებთან შეხება უწევთ.

ჟურნალისტის შეკითხვაზე- ,,რას ურჩევდით საზოგადოებას, როგორ უნდა მოექცნენ ,,მიშისტებს“, რომ რამე შარში არ გაეხვნენ?“ მერაბიშვილი რჩევას იძლევა:

,,მათ, უპირველესად, პოლიტიკაზე არ უნდა დაუწყონ ლაპარაკი, აუგად არ უნდა მოიხსენიონ სააკაშვილი, მისი მომხრე პოლიტიკოსები, ის 9 წლიანი პერიოდი როცა ის მართავდა ქვეყანას... ეს სავარაუდოდ აგრესიულს გახდით მათ.

გასწრებაზე მიგიდგებათ საქმე,თუ სადმე გადაეყრებით ამგვარ ადამიანს ან ადამიანთა ჯგუფს, მიშა საერთოდ არ ახსენოთ,უბრალოდ გაერიდეთ, წადით“.

ფსიქოლოგი ურჩევს ,,ანტიმიშისტებს“, რომ სჯობს მათ ექსპრეზიდენტის ქება-დიდებაში აჰყვნენ, წინააღმდეგ შემთხვევაში დაზარალდებიან. ფსიქოლოგი ამბობს, რომ თუ მიშაზე აუგს ვინმე იტყვის, ,,მიშისტები“ მას არ დაინდობენ და სცემენ კიდეც.

ჟურნალისტის კითხვა: ,,დიდი მადლობა გაფრთხილებისთვის, ბ-ნო გივი,, აუცილებლად გავითვალისწინებ თქვენს რჩევას, საკუთარ თავს რა შეიძლება დაუშავონ ამ დეპრესიულმა ადამიანებმა?“

გივი მერაბიშვილი: ,,არა მგონია მომავალში სუიციდის შემთხვევას ჰქონდეს ადგილი ,,მიშიზმის“ ნიადაგზე, თუმცა მიშისტებმა შესაძლოა საკუთარ თავს რაიმე დაუშავონ ღრმა დეპრესიის შემთხვევაში.

დაბეჯითებით შემიძლია ვთქვა, რომ ,,მიშიზმის“ ნიადაგზე გამოწვეული დეპრესია თავის მხრივ გამოიწვევს მუდმივ უხასიათობას , შიშებს , შრომისუნრიანობის დაქვეითებას, ცხოვრებაზე ხელის ჩაქნევას და სხვა მოვლენებს.“- ამბობს ფსიქოლოგი.

შეკითხვაზე, ,,ამგვარი ადამიანები“ ხომ არ დაიწყებენ მიშას და მისი ნათესავების დაბადების დღეების აღნიშვნას, ფსიქოლოგი პასუხობს, რომ ამგვარი ახირებები მათ ნამდვილად ახასიათებთ, შესაძლოა მათ არ დაავიწყდეთ ვარდების რევოლუციის წლისთავის აღნიშვნა.

მერაბიშვილის თქმით, ისინი ყველა იმ თარიღს აღნიშნავენ, რომელსაც ,,მათი აზრით, მიშაც იზეიმებდა“.

გამოცემა იმითაც დაინტერესდა, ექვემდებარებიან თუ არა ,,მიშისტები“ მკურნალობას:

,,კი მათ ფსიქოთერაპიის კურსი სჭირდებათ, მკურნალობის გარეშე ავადმყოფები არ განიკურნებიან და ეს აქსიომაა,“- ამბობს ფსიქოლოგი.

გამოცემა დაინტერესდა, რა ეშველებათ კონკრეტულად უიმედო ავადმყოფებს:

მათი საშველი, როგორც ფსიქოლოგი ამბობს, სააკაშვილის პრეზიდენტად დაბრუნებაა.

,,რამდენადაც ეს გამორიცხულია, ამდენად ბევრი ,,მიშისტი“ დეპრესიიდან, ალბათ ვერ გამოვა და მათი განკურება ვერ მოხერხდება, ძალიან სამწუხაროა, მაგრამ მათ ასეთი პერსპექტივა ელით“- ამბობს გივი მერაბიშვილი.

ჟურნალისტი და ფსიქოლოგი ფიქრობენ, რომ ,,მიშისტების“ მკურნალობის დაფინანსება სახელმწიფომ საკუთარ თავზე უნდა აიღოს, რადგან ,,მიშიზმის“ მიმდევრები სისტემის მსხვერპლად შეიძლება ჩაითვალონ.

პ.ს. როგორც სტატიას აწერია, ინტერვიუ ,,ნახევრად ხუმრობით“ არის ჩაწერილი.