თუ ავტომობილში ნაპოვნი ნივთები ძმასთან მიჰქონდა, თვალთვალი რატომ არ გააგრძელეს და არ გაყვნენ მასთან? ცხადია, რომ ნივთები ჩაუდეს

თუ ავტომობილში ნაპოვნი ნივთები ძმასთან მიჰქონდა, თვალთვალი რატომ არ გააგრძელეს და არ გაყვნენ მასთან? ცხადია, რომ ნივთები ჩაუდეს - ბიძინა ესებუას ადვოკატი

სამართალი - 22:01, 12 Dec, 2020

5247

ზუგდიდში, "საქართველოს ბანკზე" თავდასხმისთვის ძებნილი ბადრი ესებუას ძმის ბიძინა ესებუას ადვოკატის იოსებ ჯანაშიას თქმით, ნივთები, რომლებიც ბიძინა ესებუას ავტომობილში აღმოუჩინეს, სამართალდამცველების მიერაა ჩადებული.

ჯანაშიას განმარტებით, მისი დაცვის ქვეშ მყოფი ძებნილ ძმასთან კონტაქტს უარყოფს და ამას ის გარემოებაც ადასტურებს, რომ თუ რეალურად მასთან აპირებდა წასვლას, პოლიცია გააგრძელებდა თვალთვალს და ბადრი ესებუას კვალზეც გავიდოდა:

„ამბობს, რომ მანქანის საბარგულში ჩაუდეს, ორი დღე იდგა სამსახურთან მანქანა და საბარგული არ იკეტებოდა, ჩადებულია ორი ხელყუმბარა, ჟანგიანი 100 ცალი ტყვია, საჭმელი და თოკი. პოლიციის ვერსიაა, არის რომ თავის ძმასთან მიჰქონდა, მაგრამ გზაში დააკავეს. თუ თავის ძმასთან მიჰქონდა, თვალთვალი რატომ არ გააგრძელეს და რატომ არ გაყვნენ ბოლომდე?! იქნებ მართლა შემდგარიყო ეს კონტაქტი. უბრალოდ რაღაც უაზრო თემაა. ცხადია, რომ ჩაუდეს“,- განაცხადა ჯანაშიამ.

შეგახსენებთ, რომ ბადრი ესებუას ძმა ბიძინა ესებუა დღეს პოლიციამ ავტომობილის ჩხრეკის შემდეგ დაკავა, რადგან ავტომობილის საბარგულში აღმოჩენილი იქნა ცეცხლსასროლი იარაღი, საბრძოლო მასალა და ასაფთქებელი მოწყობილობა. ამასთან, სამართალდამცველებმა მანქანაში საკვები პროდუქტები და საძილე ტომარაც იპოვნეს, რამაც მათი ეჭვი ძმასთან კონტაქტის შესახებ კიდევ უფრო გაამყარა.