მოსახლეობის როლი ადგილობრივ თვითმმართველობაში

საზოგადოება - 20:03, 29 Nov, 2013

1843

როგორც საზოგადოებისათვის ცნობილია, პარლამენტში ინიცირებული იქნა კანონპროექტი ადგილობრივი თვითმმართველობის კოდექსის სახით, რომელიც ძალაში უნდა შევიდეს 2014 წლის ადგილობრივი თვითმმართველობის არჩევნების შემდეგ.
ზოგადად შეიძლება ითქვას, რომ კანონპროექტი პროგრესულია - გაზრდილია ადგილობრივი თვითმმართველობის ორგანოების საქმიანობის გამჭვირვალობის დონე; წინგადადგმულ ნაბიჯად შეიძლება ჩაითვალოს მუნიციპალიტეტთა რეგიონული გაერთიანების ინსტიტუტი, რომელიც უსათუოდ ზრდის გუბერნატორის პასუხისმგებლობის ხარისხს; დაზუსტებულია საზოგადოების მონაწილეობის ფორმები ადგილობრივი ხელისუფლების განხორციელებაში.
ყველანი ვთანხმდებით, რომ დემოკრატიული, ეფექტური ადგილობრივი თვითმმართველობის მთავარ ღირებულებას ადგილობრივი საკითხების გადაწყვეტაში მოსახლეობის ჩართულობის ხარისხი წარმოადგენს. ამ მხრივ, რეფორმატორთა კლუბს გვსურს მკითხველის ყურადღება მივაპყროთ კანონპროექტის ნოვაციას - საზოგადოებრივი საბჭოს როლს მუნიციპალიტეტების საქმიანობაში.
კანონპროექტის თანახმად, საზოგადოებრივ საბჭოს ქმნიან შესაბამისი დასახლების მოქალაქეები, რომლებიც მათ მიერვე არჩეული წარმომადგენლის მეშვეობით მონაწილეობენ მუნიციპალიტეტის საქმიანობაში - საკრებულოს სხდომებზე მონაწილეობის მიღება, გამგებლისათვის სხვადასხვა საკითხებზე წინადადებების წარდგენა და სხვ. საზოგადოებრივი საბჭო ფუნქციონირებს საჯარო სამართლის იურიდიული პირის სტატუსით.კანონპროექტის შესაბამისად, დასახლებაში შეიძლება შეიქმნას მხოლოდ ერთი საზოგადოებრივი საბჭო, გარდა თვითმმართველი - დიდი ქალაქებისა, სადაც საზოგადოებრივი საბჭოები იქმნება კონკრეტულ მუნიციპალური ტერიტორიების მიხედვით - ანუ ნებისმიერ შემთხვევაში ერთ მუნიციპალიტეტთან დასაშვებია მხოლოდ ერთი საზოგადოებრივი საბჭოს არსებობა.
მიგვაჩნია, რომ საზოგადოებრივი საბჭოების რაოდენობის შეზღუდვა არ არის მართებული შემდეგ გარემოებათა გამო:
მუნიციპალიტეტის უფლებამოსილება მოიცავს საკითხების გადაწყვეტას საკმაოდ მრავალ და ამავდროულად ერთმანეთისაგან რადიკალურად განსხვავებულ საკითხებზე - მაგალითად გარე რეკლამის განთავსების წესები, მშენებლობის ნებართვის გაცემა, შინაური ცხოველების ყოლის წესები, კულტურული მემკვიდრეობის დაცვა, ტრანსპორტი, ადგილობრივი გადასახადები და სხვ.მუნიციპალტიტეტის კომპეტენციის ასეთი მრავალფეროვნებიდან გამომდინარე, მიზანშეუწონელია მხოლოდ ერთი საზოგადოებრივი საბჭოს არსებობა, რომელიც შეზუდული რაოდენობით იქნება წარმოდგენილი საკრებულოს სხდომებში. წარმომადგენელთა შეზღუდული რაოდენობა ნიშნავს შეზღუდულ კომპეტენციას იმ კონკრეტულ საკითხზე, რომელიც უნდა განიხილოს მუნიციპალიტეტმა. წარმოვიდგინოთ, საზოგაოებრივი საბჭოს თავმჯდომარე ან რომელიმე უფლებამოსილი წარმომადგენელი, რომელიც პროფესიით არის ინჟინერი ან ზოოვეტერინარი და საკრებულოს სხდომაზე წარადგენს პოზიციას სკოლამდელი და სკოლისგარეშე აღმზრდელობითი დაწესებულებების მიზანშეწონილობის თაობაზე.ცხადია, ასეთ შემთხვევაში საზოგადოებრივი საბჭოს ფუნქციონირება და ჩართულობა ადგილობრივ თვითმმართველობაში არ იქნება ეფექტური და ხარისხიანი. გაცილებით უფრო რთული იქნება მდგომარეობა დიდ დასახლებებსა და ქალაქებში, სადაც ადგილობრივი განვითარების მრავალმხრივი პერსპექტივები არსებობს.

ნაცვლად ერთი საზოგადოებრივი საბჭოს არსებობისა, პირიქით, აუცილებელია მოსახლეობის სხვადასხვა დაინტერესებულ ჯგუფებს მიეცეს შესაძლებლობა ჩამოაყალიბონ თავიანთი გაერთიანებები, რომლებიც ცალკეულ თემატურ საკითხებზე დამოუკიდებლად წარადგენენ მუნიციპალიტეტებში კომპეტენტურ მოსაზრებებსა და წინადადებებს.ასეთი მიდგომა, თავის მხრივ ხელს შეუწყობს საკრებულოს და მთლიანად მუნიციპალიტეტს ორგანიზებულად განიხილოს სხვადასხვა საზოგადოებრივი ინიციატივები და სწრაფად და ეფექტურად მიიღოს გადაწყვეტილებები.
რეფორმატორთა კლუბი რეკომენდაციით მიმართავს საქართველოს პარლამენტს ადგილობრივი თვითმმართველობის კოდექსის პროექტიდან ამოიღოს დებულება, რომლის თანახმადაც დასახლებაში შეიძლება შეიქმნას მხოლოდ ერთი საზოგადოებრივი საბჭო.

ირაკლი კობიძე

,,რეფორმატორთა კლუბი“