ლინა ვანესა მედინა ვასკესი – ყველაზე ახალგაზრდა დედა მედიცინის ისტორიაში, რომელიც 5 წლისა და 7 თვის იყო, როცა იმშობიარა.

ლინა მედინა 1933 წლის 23 (ან 27) სექტემბერს, პერუში დაიბადა. მისი დაბადების ადგილისა და თარიღის შესახებ ზუსტი ინფორმაცია არ არსებობს. სხვადასხვა წყაროები მისი დაბადების სხვადასხვა ადგილს მიუთითებენ. გოგონას მამა ჩიბურსიო მედინა, დედა კი ვიქტორია ლოსა გახლდათ.

ლინა ხუთი წლის იყო, როცა მშობლებმა იგი საავადმყოფოში გაზრდილი მუცლის გამო მიიყვანეს. თავდაპირველად სიმსივნეს ვარაუდობდნენ, მაგრამ ექიმებმა მალევე აღმოაჩინეს, რომ გოგონა ორსულობის მეშვიდე თვეში იყო. ექიმმა ჰერარდი ლოსადამ იგი პერუს დედაქალაქში დამატებითი კვლევებისთვის წაიყვანა, რათა ორსულობა დაედასტურებინა. მედიამ უჩვეულო ფაქტის მიმართ დიდი ყურადღება გამოიჩინა. ოჯახს ამერიკულმა კინო კომპანიამ 5 ათასი დოლარიც შესთავაზა უფლების სანაცვლოდ ფილმის გადაღებაზე, მაგრამ იგი უარით იქნა გასტუმრებული.

1939 წლის 14 მაისს, საავადმყოფოში მოხვედრიდან ორ თვეში, ლინას საკეისრო კვეთა ჩაუტარდა. ეს იმისათვის გახდა საჭირო, რომ მისი მენჯები არ იყო საკმარისად განვითარებული ბუნებრივი მშობიარობისთვის. ოპერაცია ექიმმა ლოსადომ და ექიმმა ბუსალმა გააკეთეს. ოპერაციისას ექმებმა სრულებით ჩამოყალიბებული საშვილოსნო აღმოაჩინეს, რადგან გოგონას სქესობრივი მომწოფება დაბადებიდან მალევე დაეწყო.

ლინას ვაჟი დაბადებისას 2,7 კილოგრამს იწონიდა, მას ჰერარდი უწოდეს ექიმის საპატივცემულოდ. ბვაშვი იზრდებოდა და ლინას საკუთარ დად თვლიდა, ათი წლის ასაკში კი სიმართლე შეიტყო. იგი ჯანმრთელი იყო, მაგრამ 1979 წელს, 40 წლის ასაკში გარდაიცვალა, მას ძვლის ტვინის სიმსივნე ჰქონდა.

თუ რა გარემოებებში მოხდა 5 წლის ბავშვის დაფეხმძიმება ცნობილი არ არის, ლინას არც ბავშვის მამა დაუსახელებია. გამომძიებლებმა ლინას მამა დააკავეს არასრულწლოვანზე სექსუალური ძალადობის ბრალდებით, მაგრამ მალევე, მტკიცებულებების არქონის გამო გაათავისუფლეს.

ლინამ ოჯახი შექმნა, მისი მეუღლე რაულ ჰურადო იყო და 1972 წელს მეორე შვილიც გააჩინა. მას ვაჟი შეეძინა.

ლინა ცოცხალია და ის თავის ისტორიაზე აღარაფერს ყვება.