პროკურატურა თუ მიიჩნევს რომ ხურჩის ტერაქტზე ბრალდებული დამნაშავეა, ის 5 ათასლარიანი გირაოთი არ უნდა თავისუფლდებოდეს, აღნიშნული განცხადება ხურჩის ტერაქტში ბრალდებულ მალხაზ მურღულიას ადვოკატმა, გიორგი ონიანმა "პირველის" პრესკლუბში გააკეთა.

"დღეს მალხაზ მურღულია თავისუფალია ჩვენების სანაცვლოდ. პროკურატურა შევიდა აღკვეთის ღონისძიების შეცვლის მოთხოვნით და 5 ათასი ლარის სანაცვლოდ, ტერორისტს (მათი გაგებით) უშვებენ ქუჩაში, მხოლოდ და მხოლოდ იმიტომ, რომ ამ ადამიანმა "ითანამშრომლა" და რომან შამათავას დაადო ხელი, როგორ ტერორისტული აქტის ორგანიზატორს, თუმცა იქვე განაცხადა, რომ აფეთქება თავად განახორციელა. თუ ფიქრობენ, რომ ეს ადამიანი არის ტერორისტი, ეს არის ძალიან მძიმე და საზოგადოებისთვის საშიში დანაშაული, ამიტომ ის 5 ათასლარიანი გირაოთი არ უნდა გამოდიოდეს", - განაცხადა გოგა ონიანმა.

ხურჩის ტერაქტის საქმეში ბრალდებულმა, სამეგრელო-ზემო სვანეთის სპეციალურ ღონისძიებათა ცენტრის განსაკუთრებულ დავალებათა დეპარტამენტის სამმართველოს ყოფილმა თანამშრომელმა მალხაზ მურღულიამ აღიარებითი ჩვენების სანაცვლოდ საპყრობილე გუშინ დატოვა.

2008 წლის 21 მაისს ხურჩაში მომხდარ ფაქტთან დაკავშირებით შსს-ს ორი ყოფილი მაღალჩინოსანი, კონსტიტუციური უსაფრთხოების დეპარტამენტის აფხაზეთის ავტონომიური რესპუბლიკის მთავარი სამმართველოს ყოფილი უფროსი რომან შამათავა და სამეგრელო-ზემო სვანეთის სპეციალურ ღონისძიებათა ცენტრის განსაკუთრებულ დავალებათა დეპარტამენტის სამმართველოს ყოფილი თანამშრომელი მალხაზ მურღულია 22 ოქტომბერს დააკავეს.