აღნიშნულთან დაკავშირებით კაკაბაძემ განცხადება გაავრცელა.

"მართლმსაჯულების ხარვეზების დამდგენი კომისიის შექმნაზე ხელისუფლებამ უარი განაცხადა. საქართველოს იუსტიციის მინისტრ თეა წულუკიანის განცხადებით, ხელისუფლებამ უარი თქვა მართლმსაჯულების ხარვეზების დამდგენი იმ კომისიის შექმნაზე, რომლის ჩამოყალიბებასაც ერთ წელზე მეტი ხნის განმავლობაში ამაოდ ელოდა საქართველოს მოსახლეობის უმრავლესობა. მისი განცხადებით, ამის მიზეზად მთავრობამ დაასახელა იმის საშიშროება, რომ სს საქმეების გადასინჯვისა და მათ ნაწილზე გამამართლებელი განაჩენების დადგენის შემთხვევაში გამართლებული პირები მოითხოვენ ფინანსურ კომპენსაციას, რისი გადახდის საშუალებაც ბიუჯეტს არ გააჩნია.

მიგვაჩნია, რომ ხელისუფლების მხრიდან ასეთი გადაწყვეტილების მიღება იმ “უდანაშაულო დამნაშავეებისათვის” და მათი ოჯახის წევრებისათვის მიცემული დაპირების შეუსრულებლობაა, რომელთა მხარდაჭერამაც ბევრწილად განაპირობა “ქართული ოცნების” ხელისუფლებაში მოსვლა. ეს არის ქართული საზოგადოების იმ ნაწილის შეურაცხყოფა, რომლებმაც სწორედ სამართლიანობის აღდგენის იმედით მოიყვანა ხელისუფლებაში მმართველი კოალიცია.

ასეთი ცინიკური გადაწყვეტილებით ხელისუფლებამ შეურაცხყო ქართული საზოგადოება, რომლისთვისაც მთავარი ღირებულება ღირსების აღდგენა და არა ფულადი კომპენსაციების მიღებაა. შესაბამისი პოლიტიკური ნების არსებობის შემთხვევაში ხელისუფლებას თავისუფლად შეეძლო, ერთმანეთისგან გაემიჯნა სისხლის სამართლებრივი და სამოქალაქო წესით კომპენსაციის მიღების საკითხები და მიცემული დაპირება აღესრულებინა. მოვუწოდებთ საზოგადოებას, ჩვენთან ერთად გააპროტესტოს ხელისუფლების ასეთი მოქმედება და მოსთხოვოს მას დანაპირების შესრულება“, – ნათქვამია განცხადებაში.

კაკაბაძე აქციის გამართვას 15 დეკემბერს გეგმავს.

თეა წულუკიანის განცხადებით, მართლმსაჯულების ხარვეზების დამდგენი კომისიის შექმნა გადაიდო.

"მართლმსაჯულების ხარვეზების დამდგენილი კომისიის შესახებ კანონპროექტი უკვე რამდენიმე თვეა მზადაა, მას რეალურად არაფერი სჭირდება გარდა იმისა, რომ გაეგზავნოს პარლამენტს.

ჩვენ კანონპროექტი მთავრობის ერთ-ერთ ბოლო სხდომაზე გავიტანეთ, თუმცა მიუხედავად იმისა, რომ კომისიის შექმნას არავინ ეწინააღმდეგება, მთავრობამ მიიჩნია, რომ ძალიან ფრთხილადაა გასათვლელი ის შედეგები, რაც შესაძლოა ეკონომიკური და ფინანსური თვალსაზრისით მივიღოთ, ვინაიდან თუკი ადამიანი გამართლებულად იქნება მიჩნეული და მას უკვე გაუჩნდება მატერიალური მოთხოვნის დაყენების უფლება, ამისთვის დღეს ჩვენი ქვეყნის ეკონომიკური, ფინანსური მდგომარეობა მზად არ არის.

ამ ერთადერთი მიზეზის გამო ჩაითვალა, რომ ეს ამ ეტაპზე ნაადრევია, თუმცა თავისთავად იდეა უარყოფილი არ ყოფილა", - განაცხადა თეა წულუკიანმა.