ხურჩის ტერაქტის საქმეში ბრალდებულმა, სამეგრელო-ზემო სვანეთის სპეციალურ ღონისძიებათა ცენტრის განსაკუთრებულ დავალებათა დეპარტამენტის სამმართველოს ყოფილმა თანამშრომელმა მალხაზ მურღულიამ აღიარებითი ჩვენების სანაცვლოდ საპყრობილე დატოვა.

როგორც მურღულიას ადვოკატი გიორგი ონიანი აცხადებს, ბრალდებულმა საპატიმრო დაწესებულება 5 000 ლარიანი ჯარიმის გადახდის შემდეგ დატოვა. 2008 წლის 21 მაისს ხურჩაში მომხდარ ფაქტთან დაკავშირებით შსს-ს ორი ყოფილი მაღალჩინოსანი, კონსტიტუციური უსაფრთხოების დეპარტამენტის აფხაზეთის ავტონომიური რესპუბლიკის მთავარი სამმართველოს ყოფილი უფროსი რომან შამათავა და სამეგრელო-ზემო სვანეთის სპეციალურ ღონისძიებათა ცენტრის განსაკუთრებულ დავალებათა დეპარტამენტის სამმართველოს ყოფილი თანამშრომელი მალხაზ მურღულია 22 ოქტომბერს დააკავეს.