საქართველოს რეგიონული განვითარებისა და ინფრასტრუქტურის სამინიტროში, დღეს, საქართველოს 8 ქალაქის მუნიციპალიტეტებისა და სამინიტროს სამსახურების თანამშრომლებისთვის ურბანული ტრანსპორტის საინფორმაციო და მენეჯმენტის სისტემის სამდღიანი სწავლება დაიწყო. სწავლება ხორციელდება პროექტის - „GIS-ზე დაფუძნებული ურბანული ტრანსპორტის საინფორმაციო და მენეჯმენტის სისტემის შექმნა საქართველოს 8 ქალაქისთვის”, ფარგლებში, რომელსაც აზიის განვითარების ბანკი საქართველოს რეგიონული განვითარებისა და ინფრასტრუქტურის სამინისტროსთან ერთად ახორციელებს.

პროექტის მიხედვით, საქართველოს ქალაქებისთვის იქმნება, საქართველოსა და მთელი რეგიონისთვის ინოვაციური პროდუქტი - საქართველოს ქალაქების საკმარისად მაღალი სისზუსტის რუკებზე მიბმული ურბანული ტრასპორტის მრავალთემატური საინფორმაციო ბაზა. ამგვარი სისტემა ინფრასტრუქტურის რეაბილიტაციის, განვითარებისა და მომსახურების უაღრესად ეფექტური და თანამედროვე სამყაროსთვის უკვე შეუცვლელი ინსტრუმენტია.

პროექტის ამოცანებია: GIS-ზე დაფუძნებული ურბანული ტრანსპორტის საინფორმაციო და მენეჯმენტის სისტემის შექმნა საქართველოს 8 ქალაქისთვის (ქუთაისი, ფოთი, ზუგდიდი, ანაკლია, მესტია, მცხეთა, მანეული და რუსთავი); საქართველოს რეგიონალური განვითარებისა და ინფრასტრუქტურის სამინისტროს აღჭურვა სისტემის ფუნქციონირებისთვის აუცილებელი კომპიუტერული ტექნიკითა და ლიცენზირებული კომპიუტერული პროგრამებით; პროექტის შესაბამისი ქალაქების მუნიციპალიტეტების თანამშრომლების ტრეინინგი, სისტემის მრავალმხრივ გამოყენებასა და მონაცემების განახლებაში.

იფრასტრუქტურის მენეჯმენტის GIS-ზე დაფუძნებული სისტემების შექმნა საქართველოს რეგიონული განვითარებისა და ინფრასტრუქტურის სამინისტროს სტრატეგიის ერთ-ერთი ძირეული პრიორიტეტია. ამ ტექნოლოგიაზე დაფუძნებული სამუშაო ინსტრუმენტების გამოყენება ინფრასტრუქტურის მართვისა და დაგეგმვის მაქსიმალური ოპტიმიზაციის, მისი განვითარებისა და მომსახურების ხარჯების დაზოგვის საუკეთესო საშუალებას იძლევა.