ამის შესახებ იმ განცხადებაშია აღნიშნული, რომელსაც ხატიაშვილი ბრიუსელიდან ავრცელებს. "შეშფოთებული ვარ საქართველოს ადვოკატთა ასოციაციის წევრის, სამეგრელოს რეგიონში ადვოკატთა ასოციაციის თავმჯდომარის წარმომადგენლის, უფლებადამცველის თანდილა ჯოლოგუას მიმართ განხორციელებული დევნის გამო, რომელსაც სამეგრელო- ზემო სვანეთის საოლქო პროკურატურა ახორციელებს.

ადვოკატი თანდილა ჯოლოგუა სამოქალაქო საქმეზე საქმის მორიგებით დამთავრების შემდეგ, წარმოებაში არსებულ საქმესთან დაკავშირებით, დაბარებული და დაკითხული იქნა სამეგრელო-ზემო სვანეთის საოლქო პროკურატურაში.

ევროპის ადვოკატთა საერთაშორისო ობსერვატორიამ საგამოძიებო ორგანოებში ქართველ ადვოკატთა დაბარებები და დაკითხვები იმ საქმეებთან დაკავშირებით, რომელსაც ისინი აწარმოებენ, შეაფასა როგორც ადვოკატთა დევნა. იმ არაკვალიფიციური პროკურორების გასაგონად, რომლებიც არ იცნობენ ადვოკატებთან მიმართებაში დადგენილ საერთაშორისო სტანდარტებს, განვმარტავ, რომ ადვოკატის გაიგივება მისი დაცვის ქვეშ მყოფ პირთან ან დაკითხვა საადვოკატო უფლებამოსილების განხორციელების დროს, წარმოადგენს საადვოკატო საქმიანობაში ხელის შეშლას.

მთელი ცივილიზებული სამყარო ადვოკატებთან მიმართებაში ხელმძღვანელობს გაეროს ძირითადი პრინციპებით ადვოკატის როლის შესახებ (27 აგვისტო-7 სექტემბერი, 1990, ჰავანა), რომელიც შემდგომ მთლიანად ასახულ იქნა მინისტრთა კომიტეტის დადგენილებაში. Gგაეროს ძირითად პრინციპებში, ადვოკატის როლის შესახებ აღნიშნულია, რომ:

16. სახელმწიფოებმა უნდა უზრუნველყონ, რომ ადვოკატებმა :

ა). შეძლონ თავიანთი პროფესიული ფუნქციების შესრულება, დაშინების, დაბრკოლების, ღირსების შელახვისა და არასათანადო ჩარევის გარეშე;

ბ). შეძლონ თავისუფლად გადაადგილდნენ და კონსულტაცია გაუწიონ კლიენტს, როგორც ქვეყნის შიგნით, ისე მის გარეთ და

გ). თავიანთი პროფესიული მოვალეობების, წესებისა და ეთიკის შესაბამისად განხორციელებული რაიმე ქმედების გამო არ განიცადონ გაკიცხვა, ან დევნა ადმინისტრაციული, ეკონომიკური, სოციალური ან სხვა სანქციების მუქარით. 17.

როდესაც ადვოკატთა უსაფრთხოებას, მათ მიერ პროფესიული საქმიანობის განხორციელების გამო საფრთხე ემუქრება, ისინი სათანადოდ უნდა იყვნენ დაცული ხელისუფლების მიერ.

18. ადვოკატები თავიანთი ფუნქციის შესრულების გამო არ უნდა იყვნენ იდენტიფიცირებული მათ კლიენტებთან ან მათი კლიენტების ქმედებასთან;

19. არცერთ სასამართლოს ან ადმნისტრაციულ ორგანოს, სადაც აღიარებულია წარმომადგენლობაზე უფლება, არ აქვს უფლება უარი უთხრას ადვოკატს წარსდგეს სასამართლოს წინაშე თავისი კლიენტის დასაცავად, გარდა იმ შემთხვევისა, როდესაც ადვოკატი დისკვალიფიცირებულია შიდასახელმწიფოებრივი კანონმდებლობისა და პრაქტიკის წესების ან ამ პრინციპების შესაბამისად.

20. ადვოკატი უნდა სარგებლობდეს სამოქალაქო და სისხლისსამართლებრივი იმუნიტეტით ყველა განცხადების მიმართ, რომელიც მის მიერ სასამართლოს, ტრიბუნალის ან სხვა სასამართლო ან ადმინისტრაციული ხელისუფლების წინაშე წარდგენილია კეთილი განზრახვით, ზეპირი ან წერილობითი ფორმით. ადვოკატი თანდილა ჯოლოგუა დაეხმარა კლიენტს ავტომანქანის დაბუნებაში.

იმის გამო, რომ მისი მოწინააღმდეგე მხარე აღმოჩნდა ქართული ოცნების აქტივისტი, პროკურატურა ცდილობს დააშინოს ადვოკატი, რაც დაუშვებელია. 2013 წლის 29 ივლისს, ბრიუსელში, მონაწილეობას მივიღებ ევროპის ადვოკატთა ასოციაციის და სამართლის საბჭოს პლენარულ სესიაში სადაც განხილული იქნება ცნობილი ადვოკატის და უფლებადამცველის თანდილა ჯოლოგუას მიმართ განხორცილებული ძალადობა.

მივმართავ ბრიუსელიდან ახალ მთავარ პროკურორს, სასწრაფოდ აღკვეთოს ადვოკატის და უფლებადამცველის თანდილა ჯოლოგუას მიმართ განხორცილებული ძალადობა", - ნათქვამია განცხადებაში.