ვანო მერაბიშვილის სასამაღტლო პროცესზე, რომელზეც 2011 წლის 26 მაისთან დაკავშირებული ბრალდება განიხილებოდა, მოსამართლემ არ დააკმაყოფილა არც ბრალდების, არც დაცვის მოთხოვნები.

ბრალდების მხარე ცნობილი ამერიკული კომპანია „დექსუსის“ დასკვნის საქმიდან ამოღებას ითხოვდა და იმ მოწმეების სასამართლოზე დაკითხვის წინააღმდეგი იყო (მაგალითად, შს მინისტრის ყოფილი მოადგილის შალვა ჯანაშვილის), რომლებსაც ჩვენება უკვე მიცემული ჰქონდათ.

რაც შეეხება დაცვის მხარეს, მან დღეს ვანო მერაბიშვილისთვის აღმკვეთ ღონისძიებად წინასწარი პატიმრობის შეცვლა მოითხოვა და დაასაბუთა, რატომ არ წარმოადგენდა საფრთხეს გამოძიებისთვის ექსპრემიერის გათავისუფლება:

ადვოკატთა მტკიცებით, პირველი დაკითხვის შემდეგ, ჯერ კიდევ დაკავებამდე, ვანო მერაბიშვილი ოთხჯერ გავიდა ქვეყნიდან და ოთხჯერვე დაბრუნდა უკან, რაც ნიშნავს, რომ მას ქვეყნიდან გასვლის, გაქცევის სურვილი და მცდელობა არ ჰქონია. ამასთან, ვანო მერაბიშვილის ინტერესების დამცველები აცხადებენ, რომ იმ პირობებში, როცა უკვე დასრულებულია 26 მაისის საქმესთან დაკავშირებული გამოძიება და მასალები სრული სახით გადაგზავნილია სასამართლოსთვის, მერაბიშვილი ვერ მოახდენს ზეწოლას გამოძიებასა და მოწმეებზე. 

საბოლოოდ, მოსამართლემ გადაწყვიტა, რომ ვანო მერაბიშვილის საქმეში დარჩება „დენსუსის“ დასკვნა, მოწმეები დაიკითხებიან სასამართლოს მიერ, ხოლო ვანო მერაბიშვილს აღმკვეთი ღონისძიების სახით მისჯილი წინასწარი პატიმრობა არ გაუუქმდება.

სასამართლო პროცესი 2 დეკემბერს განახლდება.