დღეს ყოფილი პრემიერის ვანო მერაბიშვილის სასამართლო პროცესი გაიმართება. დღევანდელ წინასასამართლო სხდომაზე, 26 მაისის მოვლენების განხილვა მოხდება.

სხდომაზე მოსამართლე ამერიკის შეერთებული შტატების სახელმწიფო დეპარტამენტის დაკვეთით, ამერიკული კომპანია "დენსუსის" მიერ მომზადებულ სარეკომენდაციო ხასიათის დოკუმენტს გამოიკვლევს და მის მტკიცებულებად ცნობასთან დაკავშირებით გადაწყვეტილებას მიიღებს.

მტკიცებულებათა ნუსხიდან "დენსუსის" ანგარიშის ამოღებას ბრალდების მხარე ითხოვს. დაცვის მხარე კი ფიქრობს, რომ პროკურატურის მოთხოვნა უსაფუძვლოა და იმედოვნებს, რომ სასამართლო შუამდგომლობას არ დააკმაყოფილებს.

შეგახსენებთ, 2011 წლის 26 მაისის მოვლენებთან დაკავშირებით, ვანო მერაბიშვილს დამამძიმებელ გარემოებებში სამსახურებრივი უფლებამოსილების გადამეტებაში ედება ბრალი.