ჟურნალისტმა და ტელეწამყვანმა დავით პაიჭაძემ საქართველოს პრეზიდენტის (2004-2013) მიხეილ სააკაშვილის ხელმოწერით საპრეზიდენტო ბრწყინვალების ორდენი მიიღო.

ჟურნალისტი მადლობას „ფეისბუქის“ საშუალებითაც იხდის და აცხადებს, რომ ეს მისთვის ტვირთი უფროა, ვიდრე ჯილდო:

"ბრწყინვალების საპრეზიდენტო ორდენი ენიჭება კულტურის, განათლების, მეცნიერების, ხელოვნების, სპორტისა და სხვა დარგის გამოჩენილ მოღვაწეებს საზოგადოებრივი ცხოვრების შესაბამის სფეროში გამორჩეული მიღწევებისათვის და საქართველოს წინაშე აღმატებული ღვაწლისათვის" (საქართველოს სახელმწიფო ჯილდოების – ორდენებისა და მედლების დებულებიდან).

მიმაჩნია, ჩემი საქმიანობა გაცილებით მოკრძალებულად შეიძლება შეფასდეს, ვიდრე ზემოთმოტანილი სიტყვები გულისხმობს. მესმის, დებულება ერთი ადამიანისთვის არ იწერება, მაგრამ სიტყვა "გამოჩენილი", "აღმატებული", "მოღვაწე" და "მოღვაწეობა" არასოდეს მემეტებოდა და არც ახლა მემეტება ჩემი თავისთვის.

გუშინ საღამოს გადმომცეს ბრწყინვალების ორდენი. ეს იყო სრულიად მოულოდნელი და ძალიან გასაკვირი –– იმდენად, რომ გახარებაც ვერ მოვახერხე.

მადლობა იმ ადამიანებს, უწინარესად საქართველოს პრეზიდენტს (2004–2013) მიხეილ სააკაშვილს, ვინც ეს გადაწყვეტილება მიიღო. ჩემთვის ეს არის უფრო ტვირთი, ვიდრე ჯილდო, რომლის დამსახურებაც მომავალში უნდა გავამართლო ამ საზოგადოების წინაშე –– საზოგადოებისა, ვისი სახელითაც ენიჭებათ ადამიანებს სახელმწიფო ჯილდოები“, - წერს დავით პაიჭაძე.