„112“-ის ორგანიზებით კონფერენცია „გამოცდილების გაზიარება საქმიანობის პრიორიტეტულ ასპექტებზე“ გაიმართება

საზოგადოება - 10:51, 25 Nov, 2013

792

ევროკავშირის წევრი და არაწევრი ქვეყნების საგანგებო სიტუაციების მართვის სამსახურების ხელმძღვანელი პირები გამოცდილებას ქართველ კოლეგებს გაუზიარებენ. კონფერენციის ფარგლებში განხილული ძირითადი თემები, ზარის ინიციატორის ადგილმდებარეობის განსაზღვრა, ერთდონიანი დისპეტჩერიზაცია და ცრუ ზარების პრევენციის საკითხები იქნება.

აღნიშნულ კონფერენციას საპატიო სტუმრის სტატუსით ევროპის საგანგებო ნომრის ასოციაციის (EENA) მრჩეველთა საბჭოს თავმჯდომარე დემეტრიოს პიროსი დაესწრება. ღონისძიებაში მონაწილეობას ფინეთის, რუმინეთის, ესპანეთის, პოლონეთის, სლოვაკეთის, ხორვატიის, იტალიის, აზერბაიჯანის, მოლდოვისა და უკრაინის (10 ქვეყნის) ანალოგიური უწყებების მაღალი თანამდებობის პირები მიიღებენ. მოწვეულ სტუმართა შორის იქნებიან შსს-ოს ხელმძღვანელი პირები, „112“-ის მომიჯნავე სამსახურების და დიპლომატიური კორპუსის წარმომადგენლები.

ღონისძიება შინაგან საქმეთა სამინისტროს „112“-ის დეპარტამენტის ინიციატივითა და ევროკომისიის ხელშეწყობით, ტექნიკური დახმარებისა და ინფორმაციის გაცვლის ინსტრუმენტის (TAIEX) ფარგლებში ჩატარდება.