დღეს ქუთაისის საქალაქო სასამართლოში ვანო მერაბიშვილისა და ზურაბ ჭიაბერაშვილის საქმის განხილვა გაგრძელდება. პროცესზე ისევ ბრალდების მოქწმეები დაიკითხებიან. დაესწრება თუ არა პროცესს ყოფილი პრემიერი, ჯერჯერობით უცნობია.

მერაბიშვილსა და ჭიაბერაშვილს ბრალი სისხლის სამართლის კოდექსის სამი მუხლით აქვთ წაყენებული, მათ ამომრჩევლის მოსყიდვა, სახელმწიფო თანხის მითვისებას, გაფლანგვას და სამსახურეობრივი უფლებამოსილების ბოროტად გამოყენებას ედავებიან. საქმე 2012 წელს დასაქმების სახელმწიფო პროგრამის განხორციელებას ეხება. მიმდინარე პროცესს და გამოძიებას „აბსურდის თეატრს“ უწოდებს ზურაბ ჭიაბერაშვილი:

,,მივადექით იმ ეტაპს, როდესაც უკვე ბრალდების მიერ, მოყვანილი მოწმეების ჩვენებები, ახალს არაფერს არ იძლევა. არც ერთ მოწმეს ჩვენება კონკრეტულად ვანო მერებიშვილის ან ჩემს წინააღმდეგ არ მიუცია. 3969 მოწმის ამ რეჟიმით ტარება, პრაქტიკულად, ყოველგვარ აზრს მოკლებულია. ამიტომ, ვფიქრობ, რომ უახლოეს სხდომებზე პროკურატურამ უნდა მიიღოს გადაწყვეტილება, შეწყვეტოს ეს აბსურდის თეატრი“, - აცხადებს ჭიაბერაშვილი.